വാഷിങ്ടണ്‍: ഇന്ത്യന്‍ സ്റ്റീല്‍ പൈപ്പുകള്‍ക്ക് അമേരിക്ക തീരുവ ചുമത്തുന്നു. ഇക്കാര്യത്തില്‍ അന്തിമ തീരുമാനം കൈക്കൊണ്ടതായി യു.എസ് ഇന്റര്‍നാഷനല്‍ ട്രേഡ് കമ്മിഷന്‍ (ഐ.ടി.സി) വെളിപ്പെടുത്തി. ചൈനീസ് പൈപ്പുകള്‍ക്കും തീരുവ ചുമത്താന്‍ തീരുമാനമായിട്ടുണ്ട്.
ദീര്‍ഘവ്യാസമുള്ള പ്രത്യേക സ്റ്റീല്‍ പൈപ്പുകള്‍ക്കാണ് തീരുവ ചുമത്തുന്നത്. ഇവയുടെ വന്‍തോതിലുള്ള ഇറക്കുമതി യു.എസ് നിര്‍മാതാക്കള്‍ക്കു തിരിച്ചടിയായിട്ടുണ്ടെന്നും ഇതേതുടര്‍ന്നാണ് നടപടിയെന്നും ഐ.ടി.സി അറിയിച്ചു. ഇന്ത്യയില്‍നിന്നും ചൈനയില്‍നിന്നും ഇറക്കുമതി ചെയ്യുന്ന സ്റ്റീല്‍ പൈപ്പ് ഉല്‍പന്നങ്ങള്‍ക്ക് ന്യായരഹിതമായ തോതിലാണ് സബ്‌സിഡി അനുവദിച്ചിരിക്കുന്നതെന്നും ഇത് യു.എസ് മാര്‍ക്കറ്റിനെ തകര്‍ത്തിരിക്കുകയാണെന്നും കഴിഞ്ഞ മാസം വാണിജ്യ മന്ത്രാലയം വ്യക്തമാക്കിയിരുന്നു. ആഭ്യന്തര നിര്‍മാതാക്കളെ സംരക്ഷിക്കാനായി അന്ന് ഇറക്കുമതി ചരക്കുകള്‍ക്ക് തീരുവ പ്രഖ്യാപിക്കുകയും ചെയ്തിരുന്നു.
ആഭ്യന്തര സ്റ്റീല്‍ നിര്‍മാതാക്കളായ ഒരു സംഘം നല്‍കിയ പരാതിയിലാണ് വാണിജ്യ മന്ത്രാലയത്തിന്റെയും ഐ.ടി.സിയുടെയും നടപടി. 16 ഇഞ്ചിലേറെ വ്യാസമുള്ള, ഇരുമ്പ് ഉരുക്കിയതും ലോഹമിശ്രിതവുമായ പൈപ്പുകള്‍ക്കാണ് തീരുവ ഏര്‍പ്പെടുത്തുന്നത്. കഴിഞ്ഞ വര്‍ഷം ഇന്ത്യയില്‍നിന്നും ചൈനയില്‍നിന്നും യഥാക്രമം 294.7 മില്യന്‍ ഡോളറും 29.2 മില്യന്‍ ഡോളറും വിലമതിക്കുന്ന വ്യാസമേറിയ സ്റ്റീല്‍ പൈപ്പുകള്‍ ഇറക്കുമതി ചെയ്തിരുന്നു.