കണ്ണൂര്‍: റെയില്‍വേയില്‍ ജോലി വാഗ്ദാനം ചെയ്ത് ഉദ്യോഗാര്‍ഥികളില്‍ നിന്നും രണ്ടുകോടിയോളം രൂപ തട്ടിയെടുത്ത കേസില്‍ രണ്ടുപേരെ പൊലിസ് അറസ്റ്റുചെയ്തു. കോയമ്പത്തൂര്‍ തെലുഗുപാളയം ഉഡയര്‍ സ്ട്രീറ്റ് സ്വദേശിയും മംഗളൂരു ഡയറി റോഡില്‍ താമസക്കാരനുമായ അലക്‌സാണ്ടര്‍ (55), കണ്ണൂര്‍ ചക്കരക്കല്‍ പൊതുവാച്ചേരിയിലെ ശ്രേയസില്‍ വി.കെ വിപിന്‍ (27) എന്നിവരെയാണ് ഡിവൈ.എസ്.പി പി.പി സദാനന്ദനും സംഘവും പിടികൂടിയത്. അഞ്ചരക്കണ്ടി, ചക്കരക്കല്‍ മേഖലയിലെ മുപ്പത്തിയഞ്ചോളം പേരില്‍ നിന്ന് നാലുമുതല്‍ അഞ്ചുലക്ഷം രൂപ വരെ വാങ്ങി തട്ടിപ്പ് നടത്തിയെന്നാണ് കേസ്. ടി.പി ഷിജിന്‍, ടി.കെ സൂരജ്, എം.പി അജയ്, അഭിജിത്ത് തുടങ്ങിയവരാണ് പൊലിസില്‍ പരാതി നല്‍കിയത്. കണ്ണൂര്‍ പന്നേന്‍പാറയില്‍ ഡോര്‍ സ്‌റ്റെപ് സര്‍വിസ് പ്ലമ്പിങ് വര്‍ക്ക് ഷോപ്പ് നടത്തിവന്ന അലക്‌സാണ്ടര്‍ ഇയാളുടെ ജോലിക്കാരനായ വിപിനെയും കൂട്ടി തട്ടിപ്പ് നടത്തുകയായിരുന്നു. താന്‍ ഐ.എ.എസ് ഉദ്യോഗസ്ഥനാണെന്ന് പറഞ്ഞാണ് തട്ടിപ്പ് നടത്തിയിരുന്നതെന്നും പൊലിസ് പറഞ്ഞു.