കാഞ്ഞങ്ങാട്: ജില്ലയിലെ കടലോരത്ത് കടലിനോടു ചേര്‍ന്നാണു മത്സ്യത്തൊഴിലാളികളുടെയും കടലോരവാസികളുടെയും വീടുകള്‍ സ്ഥിതി ചെയ്യുന്നത്. അതുകൊണ്ടു തന്നെ കടല്‍ ക്ഷോഭിച്ചാല്‍ പുനരധിവാസമാണു കടലോര നിവാസികളുടെ ആശ്രയം.
ഇത്തരത്തില്‍ കടലോരത്തോടു ചേര്‍ന്ന വീടുകളില്‍ താമസിക്കുന്നവരെ തീരത്തില്‍ നിന്നു മാറ്റി സുരക്ഷിതമായ സ്ഥലത്തു താമസിപ്പിക്കുന്നതിനായി കഴിഞ്ഞ ഇടതുമുന്നണി സര്‍ക്കാര്‍ സുനാമി പുനരധിവാസ പദ്ധതി നടപ്പാക്കിയിരുന്നു. എന്നാല്‍ പദ്ധതിക്കു തുടര്‍ച്ചയുണ്ടായില്ല. ഇതോടെ മത്സ്യത്തൊഴിലാളി പുനരധിവാസ പദ്ധതിക്കും വിരാമമായി.
പുതിയ റേഷന്‍ കാര്‍ഡില്‍ കടലോരത്തു നിരവധി മത്സ്യത്തൊഴിലാളികള്‍ എ.പി.എല്‍ ലിസ്റ്റില്‍ ഉള്‍പ്പെടുകയും ചെയ്തിട്ടുണ്ട്. പലയിടത്തും അനര്‍ഹര്‍ ബി.പി.എല്‍ ലിസ്റ്റില്‍ കയറി കൂടുകയും ചെയ്തിട്ടുണ്ട്.
ഇക്കാര്യത്തില്‍ അടിയന്തിര നടപടികള്‍ ഉണ്ടാവുമെന്ന ഉറപ്പു ലഭിച്ചിട്ടുണ്ടെങ്കിലും അതും വെള്ളത്തില്‍ വരച്ച വരപോലെയാകുമോയെന്ന ആശങ്കയിലെ കടലോര നിവാസികള്‍.