മലപ്പുറം: പരസ്യത്തിലെ അവ്യക്തത കാരണം മാറ്റിവച്ച അഭിമുഖം ഇന്നലെ മലപ്പുറം എംപ്ലോയിബിലിറ്റി സെന്ററില്‍ നടന്നു. എച്ച്.ഡി.എഫ്.സി, ഇസാഫ് ബാങ്കുകളിലേക്കുള്ള അഭിമുഖമാണ് ഇന്നലെ നടന്നത്. 285 ഉദ്യോഗാര്‍ഥികളാണ് അഭിമുഖത്തില്‍ പങ്കെടുത്തത്. ഒരു അംഗപരിമിതനുമുണ്ടായിരുന്നു. ഗ്രൂപ്പ് ചര്‍ച്ച, വ്യക്തികത അഭിമുഖം എന്നിവയാണ് ഇന്നലെ നടന്നത്. ഇതില്‍നിന്നു മികവ് പുലര്‍ത്തുന്നവരുടെ അന്തിമ ലിസ്റ്റ് പുറത്തിറക്കും. ഇവര്‍ക്കുള്ള അഭിമുഖം പിന്നീട് നടക്കും. കോഴിക്കോട് എംപ്ലോയബിലിറ്റി സെന്റര്‍ അധികൃതരും ബാങ്ക് അധികൃതരും സംയുക്തമായാണ് അഭിമുഖം നടത്തിയത്. പബ്ലിക് റിലേഷന്‍സ് വകുപ്പ് മുഖേന നല്‍കിയ പരസ്യത്തിലെ അവ്യക്തതയാണ് നൂറുകണക്കിന് ഉദ്യോഗാര്‍ഥികളെ വലച്ചത്. കോഴിക്കോട്ടു നടക്കേണ്ട അഭിമുഖം പരസ്യത്തില്‍ സ്ഥലം സൂചിപ്പിക്കാത്തതു കാരണം മലപ്പുറത്താണെന്നു തെറ്റിദ്ധരിച്ചു നൂറുകണക്കിന് ഉദ്യോഗാര്‍ഥികള്‍ കഴിഞ്ഞ വ്യാഴാഴ്ച മലപ്പുറത്തെത്തിയിരുന്നു.