തിരുവനന്തപുരം: ജില്ലയിലെ എല്ലാ താലൂക്കുകളിലും റേഷന്‍ കാര്‍ഡ് വിതരണത്തിന്റെ ആദ്യഘട്ടം പൂര്‍ത്തിയായതായും രണ്ടാംഘട്ട വിതരണം പുരോഗമിക്കുന്നതായും ജില്ലാ കലക്ടര്‍ എസ്. വെങ്കടേസപതി അറിയിച്ചു.
രണ്ടാംഘട്ട വിതരണം പൂര്‍ത്തിയായ താലൂക്കുകളില്‍ ഇനിയും റേഷന്‍ കാര്‍ഡ് കൈപ്പറ്റിയിട്ടില്ലാത്തവര്‍ക്ക് ബന്ധപ്പെട്ട കാര്യാലയത്തില്‍ നിന്നും നേരിട്ട് കൈപ്പറ്റാവുന്നതാണ്.
ആദ്യഘട്ട റേഷന്‍ കാര്‍ഡ് വിതരണം പൂര്‍ത്തിയായപ്പോള്‍ മുന്‍ഗണനാ വിഭാഗത്തിലുള്‍പ്പെട്ട അനര്‍ഹരായവരെ സംബന്ധിച്ച വ്യാപകമായ പരാതികള്‍ ശ്രദ്ധയില്‍പ്പെട്ടിട്ടുണ്ട്.
അനര്‍ഹരായ കാര്‍ഡുടമകള്‍ സ്വമേധയാ മുന്‍ഗണനാ വിഭാഗത്തില്‍ നിന്നും പിന്‍മാറി റേഷന്‍ കാര്‍ഡ് 'പൊതുവിഭാഗത്തിലേയ്ക്ക്' മാറ്റി വാങ്ങേണ്ടതാണെന്ന് കലക്ടര്‍ പറഞ്ഞു.
സര്‍ക്കാര്‍ ജീവനക്കാര്‍, പൊതുമേഖലാ ജീവനക്കാര്‍, കുടുംബ പെന്‍ഷന്‍ വാങ്ങുന്നവര്‍, സര്‍വിസ് പെന്‍ഷണേഴ്‌സ്, സ്വന്തമായി ഭൂമി, വീട്, നാലുചക്ര വാഹനമുളളവര്‍, സാമ്പത്തികമായി മെച്ചപ്പെട്ട നിലവാരം പുലര്‍ത്തുന്നവര്‍ 1500 രൂപയില്‍ കൂടുതല്‍ വൈദ്യുതി ചാര്‍ജ് ഒടുക്കുന്നവര്‍ തുടങ്ങി അനര്‍ഹരായ മുന്‍ഗണനാ വിഭാഗക്കാരെക്കുറിച്ചുളള വിവരം 1967 എന്ന ടോള്‍ഫ്രീ നമ്പരിലോ 0471 2731240 എന്ന നമ്പരിലോ ജില്ലാ സപ്ലൈ ഓഫിസില്‍ നേരിട്ടോ അറിയിക്കാവുന്നതാണ്.
പരാതിക്കാരന്റെ വിവരം രഹസ്യമായി സൂക്ഷിക്കും. അനര്‍ഹമായി മുന്‍ഗണനാ കാര്‍ഡ് കൈവശം വയ്ക്കുന്നത് ശിക്ഷാര്‍ഹമായതിനാല്‍ സപ്ലൈ ഓഫിസുമായി ബന്ധപ്പെട്ട് പൊതുവിഭാഗത്തിലേയ്ക്ക് ഈ മാസം 10ന് മുന്‍പായി മാറ്റി വാങ്ങേണ്ടതാണ്.
തുടര്‍ന്നും അനര്‍ഹമായി കാര്‍ഡ് കൈവശം വച്ച് റേഷന്‍ സാധനങ്ങള്‍ കൈപ്പറ്റുന്നവര്‍ക്കെതിരേ 1955 ലെ അവശ്യസാധനനിയമപ്രകാരവും ഐ.പി.സി പ്രകാരവും പിഴിക്ഷാനടപടികള്‍ സ്വീകരിക്കുന്നതാണെന്നും കലക്ടര്‍ അറിയിച്ചു.