കണ്ണൂര്‍: വിവരാവകാശ നിയമപ്രകാരമുള്ള അപേക്ഷകള്‍ക്ക് മറുപടി നല്‍കുന്നതില്‍ ബന്ധപ്പെട്ട പൊതുവിവരാവകാശ ഓഫിസര്‍മാര്‍ കൂടുതല്‍ ഉത്തരവാദിത്ത ബോധവും ജാഗ്രതയും കാണിക്കണമെന്ന് സംസ്ഥാന വിവരാവകാശ കമ്മിഷനംഗം കെ.വി സുധാകരന്‍. കണ്ണൂര്‍ കലക്ടറേറ്റില്‍ നടത്തിയ സിറ്റിങ്ങിലാണ് അദ്ദേഹം ഇക്കാര്യം അഭിപ്രായപ്പെട്ടത്. യഥാസമയം മറുപടി കൊടുക്കാതിരിക്കുന്നത് പോലെ തന്നെ കുറ്റകരമാണ് അവ്യക്തവും തെറ്റിദ്ധാരണാജനകവുമായ മറുപടി നല്‍കുന്നതും. അപേക്ഷകരുടെ അറിയാനുള്ള അവകാശം ദുര്‍ബലമായ ന്യായവാദങ്ങള്‍ നിരത്തി നിഷേധിക്കുന്നത് ശരിയല്ലെന്നും അദ്ദേഹം പറഞ്ഞു.
പല പൊതുവിവരാവകാശ ഓഫിസര്‍മാരും ഒന്നാം അപ്പീല്‍ അധികാരിയായ അവരുടെ മേലുദ്യോഗസ്ഥന്റെ നിര്‍ദേശമോ തീരുമാനമോ പോലും അനുസരിക്കാതിരിക്കുന്നത് ഗുരുതരമായ കൃത്യവിലോപമാണ്. അത് നടപടികള്‍ ആവശ്യപ്പെടുന്ന അച്ചടക്ക ലംഘനവുമാണ്. കമ്മിഷന്‍ പരിഗണിച്ച അപ്പീലുകളില്‍ പൊതു വിവരാവകാശ ഓഫിസര്‍മാരായ ഏതാനും പഞ്ചായത്ത് സെക്രട്ടറിമാര്‍ അപ്പീല്‍ അധികാരിയായ പഞ്ചായത്ത് ഡെപ്യൂട്ടി ഡയരക്ടറുടെ തീരുമാനങ്ങളും നിര്‍ദേശങ്ങളും അനുസരിച്ച് പ്രവര്‍ത്തിച്ചില്ലെന്ന് കമ്മിഷന് ബോധ്യപ്പെട്ടു. ഇതിന് വേങ്ങാട്, എരമംകുറ്റൂര്‍, ആലക്കോട് പഞ്ചായത്ത് സെക്രട്ടറിമാരോട് വിശദീകരണം തേടും.
ഒരു കേസില്‍ അപ്പീല്‍ അധികാരിയായ കണ്ണൂര്‍ സര്‍വകലാശാല രജിസ്ട്രാര്‍ നിയമം അനുശാസിക്കുന്ന മട്ടില്‍ അപ്പീല്‍ തീര്‍പ്പാക്കാതിരുന്നത് ഗുരുതര കൃത്യവിലോപമാണെന്ന് കമ്മിഷന്‍ നിരീക്ഷിച്ചു.