ആലപ്പുഴ: സത്യസന്ധതയുടെ പ്രതീകമായി സണ്ണി. വഴിയില്‍ നിന്ന് ലഭിച്ച രണ്ടു ലക്ഷം രൂപ നിമിഷങ്ങള്‍ക്കുള്ളില്‍ തന്നെ ആലപ്പുഴ നോര്‍ത്ത് പൊലിസ് സ്റ്റേഷനില്‍ എത്തിച്ചാണ് ഇയാള്‍ മാതൃകയായത്. മലപ്പുറം വഴിക്കടവ് പൊലിസ് സ്റ്റേഷനിലെ പൊലിസ് ഉദ്യോഗസ്ഥനായ കരുനാഗപ്പള്ളി സ്വദേശി അരുണിന്റെ പണമടങ്ങിയ ബാഗാണ് നഷ്ടമായത്.
ബൈക്കില്‍ സൂക്ഷിച്ചിരുന്ന രണ്ട് ലക്ഷം രൂപയടങ്ങിയ ബാഗ് യാത്രയ്ക്കിടെ ബൈക്കില്‍ നിന്ന് തെറിച്ചു പോയ വിവരം 20 മിനിട്ട് കഴിഞ്ഞാണ് അരുണ്‍ അറിയുന്നത്. ആലപ്പുഴ പാതിരപ്പള്ളി ജങ്ഷന് തെക്ക് വശമുള്ള പെട്രോള്‍ പമ്പിന് സമീപത്ത് വച്ചാണ് ബാഗ് റോഡില്‍ വീണത്. പണം നഷ്ട്ടപ്പെട്ട വിഷമത്തില്‍ നോര്‍ത്ത് പൊലിസ് സ്റ്റേഷനില്‍ എത്തിയപ്പോള്‍ പണവുമായി സണ്ണി അവിടെയുണ്ട്. എസ്.ഐയുടെ സാന്നിധ്യത്തില്‍ സണ്ണി അരുണിന് പണവും ബാഗും കൈമാറി. പാതിരപ്പള്ളിയില്‍ അപ്പോഴ്‌സറി ഷോപ്പ് നടത്തുകയാണ് ഇയാള്‍. അരുണ്‍ നിര്‍ബന്ധപൂര്‍വം 2000 രൂപ സമ്മാനവും നല്‍കിയാണ് പിരിഞ്ഞത്.