ന്യൂഡല്‍ഹി: ബാബരി മസ്ജിദ് ഭൂമിതര്‍ക്കകേസിലെ വിധി പുനപരിശോധിക്കണമെന്നാവശ്യപ്പെട്ട് പ്രമുഖരായ 40 സാമൂഹികപ്രവര്‍ത്തകര്‍ സുപ്രിം കോടതിയില്‍. പ്രഭാത് പട്‌നായിക്ക്, ഇര്‍ഫാന്‍ ഹബീബ്, ജയന്ത് ഘോഷ്, നന്ദിനി സുന്ദര്‍ തുടങ്ങിയവരുടെ നേതൃത്വത്തിലാണ് പുനപരിശോധനാ ഹരജി നല്‍കിയിരിക്കുന്നത്. സുപ്രിം കോടതിയുടെ ഫുള്‍ ബെഞ്ച് വിധി പുനപരിശോധിക്കണമെന്നാണ് ഹരജിക്കാരുടെ ആവശ്യം.
ബാബരി മസ്ജിദിന്റെ അസ്തിത്വം ചരിത്രപരമായി രേഖപ്പെടുത്തിയിട്ടുള്ളതാണ്. എന്നാല്‍ പള്ളിയില്‍ നിര്‍മിച്ച ഹിന്ദുക്ഷേത്രത്തിന്റെ അസ്തിത്വം ഹിന്ദുക്കളുടെ വിശ്വാസം മാത്രമാണെന്നും ഹരജിയില്‍ ചൂണ്ടിക്കാട്ടുന്നുണ്ട്.

ഭരണഘടനയുടെ മതേതരത്വ സ്വഭാവത്തേയും രാജ്യത്തിന്റെ സമന്വയ സ്വഭാവത്തേയും നേരിട്ട് ബാധിക്കുന്നതാണ് വിധിയെന്ന് ഹരജിയില്‍ പറയുന്നു. ഒരു സമുദായത്തിന്റെ വിശ്വാസത്തിന് മറ്റൊരു സമുദായത്തിന്റെ വിശ്വാസത്തെ അസാധുവാക്കാന്‍ കഴിയില്ല. രണ്ട് വിഭാഗങ്ങളുടെ ആചാരങ്ങളും വിശ്വാസവും വ്യത്യാസപ്പെട്ടിരിക്കാമെന്നതിനാല്‍ താരതമ്യപ്പെടുത്താന്‍ കഴിയില്ലെന്നും ഹരജിക്കാര്‍ ചൂണ്ടിക്കാട്ടുന്നു.