താമരശേരി: സംസ്ഥാനത്ത് ആഡംബര ബസുകളുടെ നിയമലംഘനം തുടരുന്നു. വിനോദയാത്രയ്ക്കിടെ ബസിനുമുകളില്‍ പൂത്തിരി കത്തിച്ചും പടക്കം പൊട്ടിച്ചുമുള്ള ആഘോഷത്തിന്റെ ദൃശ്യങ്ങള്‍ പുറത്ത്. താമരശേരി ഗവ. വൊക്കേഷണല്‍ ഹയര്‍സെക്കന്‍ഡറി സ്‌കൂളിലെ പ്ലസ്ടു വിദ്യാര്‍ഥികളുടെ വിനോദയാത്രയ്ക്കിടെയാണ് സംഭവം.
ഈ മാസം മൂന്നിന് കുടകില്‍ വച്ചാണ് സംഭവം. അഞ്ചു ബസുകളിലായി ഡിസംബര്‍ ഒന്നിന് രാത്രി മൈസൂരു, കുടക് എന്നിവിടങ്ങളിലേക്ക് വിനോദയാത്ര പോയ സംഘത്തിലെ ഒരു വിദ്യാര്‍ഥിനിയുടെ ജന്‍മദിനത്തിന്റെ ഭാഗമായായിരുന്നു ആഘോഷം സംഘടിപ്പിച്ചത്.
പൂത്തിരി വാങ്ങിയ വിവരം അധ്യാപകരോ വിദ്യാര്‍ഥികളോ അറിയില്ലെന്നും ബസ് ജീവനക്കാര്‍ സ്വന്തം താല്‍പര്യത്തില്‍ ചെയ്തതാണെന്നുമാണ് സ്‌കൂള്‍ അധികൃതര്‍ പറയുന്നത്. പടക്കം പൊട്ടിച്ചുവെന്ന പ്രചാരണം അടിസ്ഥാനരഹിതമാണെന്നും അധികൃതര്‍ പറഞ്ഞു. ടൂറിസ്റ്റ് ബസുകാര്‍ തമ്മിലുള്ള പകപോക്കലാണ് സംഭവത്തിനുപിന്നിലെന്നും ആക്ഷേപമുയരുന്നുണ്ട്.