ഷൊര്‍ണൂര്‍: ചില സ്വകാര്യ ബസുകള്‍ സ്റ്റാന്‍ഡില്‍ കയറുന്നില്ലെന്ന് വീണ്ടും ആക്ഷേപം. കുളപ്പുള്ളി ബസ്സ്റ്റാന്‍ഡിലാണ് സ്വകാര്യ ബസ് സര്‍വീസുകള്‍ അയിത്തം കല്‍പ്പിക്കുന്നത്. ബസുവരുമെന്ന ഉറപ്പില്‍ കാത്തുനില്‍ക്കുന്ന യാത്രക്കാര്‍ക്ക് ദുരിതവും ഒപ്പം സമയനഷ്ടവും അനുഭവപ്പെടുന്നു.
ഗുരുവായൂര്‍, പട്ടാമ്പി ഭാഗങ്ങളില്‍ നിന്ന് വരുന്ന ബസുകള്‍ വാടനാംകുറുശി റെയില്‍വെ ഗേറ്റ് അടച്ചാല്‍ സമയം വൈകിയെന്ന് ചൂണ്ടികാട്ടി ബസ്സ്റ്റാന്‍ഡ് ഒഴിവാക്കുകയാണ്. തൃശൂര്‍-ഷൊര്‍ണൂര്‍-ഒറ്റപ്പാലം റൂട്ടില്‍ ഓടുന്ന ബസുകളാകട്ടെ ഗതാഗത തടസമെന്നുപറഞ്ഞ അവരും കുളപ്പുള്ളി ബസ്സ്റ്റാന്‍ഡ് ഒഴിവാക്കുകയാണ്.
ബസുകള്‍ സ്റ്റാന്‍ഡില്‍ കയറാത്തതിനാല്‍ മാസങ്ങള്‍ക്കു മുമ്പ് നാട്ടുകാര്‍ പ്രക്ഷോഭം സംഘടിപ്പിക്കുകയും ഒരു പൊലിസുകാരനെ കുളപ്പുള്ളി സ്റ്റാന്‍ഡില്‍ നിയമിക്കുകയുമുണ്ടായി.
എല്ലാ ബസുകളിലെയും കണ്ടക്ടര്‍ വന്ന് ഒപ്പിടുന്ന രീതിയായിരുന്നു. എന്നാല്‍ സ്റ്റാന്‍ഡില്‍ മിക്ക ദിവസങ്ങളിലും പൊലിസ് ഇല്ലാത്തതുകൊണ്ടാണ് ബസുകള്‍ സ്റ്റാന്‍ഡില്‍ കയറാത്തതെന്ന് യാത്രക്കാര്‍ പറയുന്നു. അതേപോലെ ചില കെ.എസ്.ആര്‍.ടി.സി ബസുകള്‍ ഷൊര്‍ണൂര്‍ സ്റ്റാന്‍ഡിലും കറയുന്നില്ല.
ബൈപാസ് വഴിയും സ്റ്റാന്‍ഡില്‍ കയറാതെയും പോകുന്ന ദീര്‍ഘദൂര യാത്രക്കാരുടെ ദുരിതം ഇരട്ടിക്കുന്നു. സ്റ്റാന്‍ഡില്‍ കയറാത്ത ബസുകള്‍ക്ക് ടൗണില്‍ നിര്‍ബന്ധമായും സ്റ്റോപ്പ് അനുവദിക്കണമെന്ന ആവശ്യം ശക്തമാകുന്നു.