കോഴിക്കോട്: സര്‍ക്കാര്‍ ഭൂമിയിലെ കൈയേറ്റങ്ങളും പുറമ്പോക്കുകളും കണ്ടെത്തുന്നതിനായി ആരംഭിച്ച റീസര്‍വേ നടപടികള്‍ തുടക്കത്തിലേ പാളിയെന്ന് സി.പി.ഐ സംഘടനയായ സര്‍വേ ഫീല്‍ഡ് സ്റ്റാഫ് അസോസിയേഷന്‍. കോഴിക്കോട്ട് നടത്തിയ വാര്‍ത്താസമ്മേളനത്തിലാണ് റീസര്‍വേയുമായി ബന്ധപ്പെട്ട് സര്‍ക്കാരിനെതിരേ സംഘടന ആരോപണം ഉന്നയിച്ചത്.
കൃത്യമായ പ്രൊജക്ട് റിപ്പോര്‍ട്ട് തയാറാക്കാതെയും ലക്ഷ്യബോധമില്ലാതെയും വകുപ്പിലെ ജീവനക്കാരെ പൂര്‍ണമായും ഉപയോഗിക്കാതെയുമാണ് റീസര്‍വേ ആരംഭിച്ചത്. സംസ്ഥാനത്തെ 904 വില്ലേജുകളില്‍ സര്‍വേ പൂര്‍ത്തിയാക്കിയെങ്കിലും ആക്ഷേപങ്ങള്‍ നിലനില്‍ക്കുന്നതിന്റെ കാരണവും സര്‍ക്കാരാണെന്നും ഇവര്‍ പറയുന്നു. ആക്ഷേപങ്ങള്‍ പരിഹരിക്കുന്നതിനായി ഇതുവരെയും കൂടിയാലോചനകള്‍ നടത്തിയിട്ടില്ല. എന്നാല്‍, ഇതിന്റെ പരിഹാരമെന്നോണം നടത്തിയ ഉത്തരവുകളെല്ലാം ഏകപക്ഷീയമായാണ് പുറപ്പെടുവിച്ചതെന്നും സംഘടന സൂചിപ്പിച്ചു.
സംസ്ഥാനത്ത് 1,674 വില്ലേജുകളില്‍ സര്‍വേ ചെയ്യാനുള്ള ജീവനക്കാരുടെ എണ്ണവും കുറവാണ്. നിലവിലുള്ള ജീവനക്കാരില്‍ പകുതി പേരും അതത് ജില്ലയിലെ താലൂക്കുകളിലേക്കും കലക്ടറുടെ റവന്യൂ കാര്യങ്ങള്‍ക്കുമായി നിയമിച്ചതും റീസര്‍വേയുടെ മെല്ലെപ്പോക്കിന് കാരണമാകുന്നുണ്ട്.
കഴിഞ്ഞ യു.ഡി.എഫ് സര്‍ക്കാരിന്റെ കാലത്ത് റീസര്‍വേ നിര്‍ത്തി വച്ചിരുന്നു. എല്‍.ഡി.എഫ് സര്‍ക്കാര്‍ കാലത്ത് ഇതു പുനഃസ്ഥാപിച്ച് ഉത്തരവിറക്കിയെങ്കിലും കാര്യമായ പുരോഗതി ഉണ്ടാക്കാന്‍ സാധിച്ചില്ലെന്നും സംഘടന ആരോപിച്ചു.