കൊല്ലം: എക്‌സൈസ് എന്‍ഫോഴ്‌സ്‌മെന്റ് ആന്‍ഡ് ആന്റിനര്‍ക്കോട്ടിക് സ്‌പെഷല്‍ സ്‌ക്വാഡും കൊല്ലം റെയില്‍വേ പ്രൊട്ടക്ഷന്‍ ഫോഴ്‌സും സംയുക്തമായി നടത്തിയ പരിശോധനയില്‍ വിശാഖപട്ടണം-കൊല്ലം ട്രെയിനില്‍ കടത്തികൊണ്ടുവന്ന 12 കിലോ കഞ്ചാവ് പിടികൂടി. കൊല്ലം റെയില്‍വേ സ്‌റ്റേഷനില്‍ പരിശോധന നടന്നുവരവേ പെട്ടെന്ന് കമ്പാര്‍ട്ട്‌മെന്റില്‍ നിന്നും ഒരാള്‍ ബാഗ് ഉപേക്ഷിച്ച് ഓടിപ്പോകുന്നതായി ശ്രദ്ധയില്‍പെട്ടു. ഇയാള്‍ അതിവേഗം സ്‌റ്റേഷന്റെ പുതിയ കവാട ഭാഗത്തേക്കാണ് ഓടിപ്പോയത്. ഇയാളെ കണ്ടെത്തുന്നതിനായി സി.സി. ടിവി ദൃശ്യങ്ങള്‍ പരിശോധിച്ചുവരുന്നു. വലിയ ബാഗില്‍ അഞ്ച് പായ്ക്കറ്റുകളിലായാണ് കഞ്ചാവ് സൂക്ഷിച്ചിരുന്നത്. പൊതുവിപണിയില്‍ ഏഴ് ലക്ഷത്തോളം രൂപ വിലവരും. സ്‌പെഷല്‍ സ്‌ക്വാഡ് സി.ഐ. എം. നൗഷാദ്, റെയില്‍വേ പ്രൊട്ടക്ഷന്‍ ഫോഴ്‌സ് എസ്.ഐ ഗോപാലകൃഷ്ണന്‍ തുടങ്ങിയവര്‍ റെയ്ഡിന് നേതൃത്വം നല്‍കി.