മാവൂര്‍: തെങ്ങിലക്കടവില്‍ ഇതരസംസ്ഥാന തൊഴിലാളികളില്‍ അഞ്ചുപേര്‍ക്ക് കോളറയുടെ ലക്ഷണം. ഇവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. പശ്ചിമംബഗാള്‍ സ്വദേശികളായ ഖമറുല്‍ ശൈഖ് (35), അറോലുദ്ദീന്‍ (32), മുഹമ്മദ് (40), ബുല്‍ബുല്‍ (19), അസീം(19) എന്നിവരാണ് മെഡിക്കല്‍ കോളജ് ആശുപത്രിയില്‍ ചികിത്സയിലുള്ളത്. 

കഴിഞ്ഞ 10 ദിവസങ്ങള്‍ക്ക് മുന്‍പ് നാട്ടില്‍നിന്ന് വന്ന ഖമറുല്‍ ശൈഖിനാണ് ആദ്യം അസുഖം ബാധിച്ചത്. ഇയാളെ കഴിഞ്ഞ ഞായറാഴ്ച ആശുപത്രിയില്‍ പ്രവേശിപ്പിച്ചിരുന്നു.
അറോലുദ്ദീനെയും മുഹമ്മദിനെയും കഴിഞ്ഞദിവസവും മറ്റുരണ്ടു പേരെ ഇന്നലേയുമാണ് ആശുപത്രിയില്‍ പ്രവേശിപ്പിച്ചത്. കൂടുതല്‍ പേര്‍ക്ക് കോളറയുടെ ലക്ഷണം റിപ്പോര്‍ട്ട് ചെയ്തതോടെ ജില്ലാ അഡിഷണല്‍ മെഡിക്കല്‍ ഓഫിസര്‍ ഡോ. ആശാദേവി, ടെക്‌നിക്കല്‍ അസി. കെ.ടി മോഹനന്‍, സി. നാരായണന്‍, സിവില്‍ സര്‍ജന്‍ ഡോ. ബേബി പ്രീത, ഹെല്‍ത്ത് സൂപ്രണ്ട് പി.പി മുരളീധരന്‍, എച്ച്.ഐ പി ഉണ്ണികൃഷ്ണന്‍, ജെ.എച്ച്.ഐ ജസ്റ്റി ജെ. ജോസ്, പഞ്ചായത്ത് വൈസ് പ്രസിഡന്റ് വളപ്പില്‍ റസാഖ്, സ്റ്റാന്റിങ് കമ്മിറ്റി ചെയര്‍മാന്‍മാരായ കെ. ഉസ്മാന്‍, കവിതാഭായ്, പഞ്ചായത്ത് അംഗങ്ങള്‍ എന്നിവര്‍ സ്ഥലത്തെത്തി സ്ഥിതിഗതികള്‍ വിലയിരുത്തി.
ഇവര്‍ ഉപയോഗിച്ച പൊതുകിണറിലെ വെള്ളം പരിശോധനയ്ക്കായി സാമ്പിള്‍ ശേഖരിച്ചിട്ടുണ്ട്. രോഗലക്ഷണങ്ങള്‍ സാങ്കേതികമായി കോളറയുടെ ലക്ഷണമാണെന്ന് ആരോഗ്യവകുപ്പ് അധികൃതര്‍ പറഞ്ഞു.
ഇവരെ കൂടുതല്‍ പരിശോധനയ്ക്കു ശേഷം ഇന്ന് മാത്രമേ സ്ഥിരീകരണം ഉണ്ടാവുകയുള്ളൂ. ആരോഗ്യവകുപ്പ്-പഞ്ചായത്ത് അധികൃതര്‍ തെങ്ങിലക്കടവിലെത്തി നാട്ടുകാരുടെ പ്രത്യേക യോഗം വിളിച്ച് രോഗസ്ഥിരീകരണത്തിനു ശേഷം കൂടുതല്‍ നടപടിയുണ്ടാവുകയുള്ളൂവെന്ന് നാട്ടുകാരെ അറിയിച്ചു.