ഇരിട്ടി: ഇരിട്ടി-കണ്ണൂര്‍, ഇരിട്ടി-തലശ്ശേരി റൂട്ടുകളില്‍ ഇന്ന് സൂചനാ പണിമുടക്ക് നടത്താന്‍ സ്വകാര്യ ബസ് തൊഴിലാളികളുടെയും ഉടമകളുടെയും സംയുക്ത യോഗം തീരുമാനിച്ചു. ഇന്നലെ രാവിലെ തലശ്ശേരിയില്‍ നിന്നു ഇരിട്ടിയിലേക്ക് സര്‍വിസ് നടത്തുകയായിരുന്ന ശ്രീഹരി ബസിലെ കണ്ടക്ടര്‍ സി.കെ റയീസിനെ മട്ടന്നൂര്‍ പൊലിസ് സ്റ്റേഷനില്‍ വച്ച് മര്‍ദിക്കുകയും കളക്ഷന്‍ ബാഗ് പിടിച്ചുവാങ്ങി പണം കൈക്കലാക്കുകയും ചെയ്തതില്‍ പ്രതിഷേധിച്ചാണ് സമരം.
തലശ്ശേരി-വളവുപാറ റോഡ് പ്രവൃത്തി നടക്കുന്നതിനാല്‍ കൂത്തുപറമ്പിലേക്കുള്ള റൂട്ട് മാറി ഓടേണ്ടി വരുന്നതുകൊണ്ട് സമയക്രമം പാലിക്കാന്‍ പല ബസുകള്‍ക്കും കഴിയുന്നില്ല. നിറയെ യാത്രക്കാരുമായി ഓടുകയായിരുന്ന ബസ് ഒരു സ്റ്റോപ്പില്‍ നിര്‍ത്തിയില്ല എന്ന കാരണത്താല്‍ ആയിരം രൂപ പിഴയടക്കാന്‍ മട്ടന്നൂര്‍ എസ്.ഐ ആവശ്യപ്പെട്ടു. വൈകുന്നേരം പണം അടക്കാമെന്ന് പറഞ്ഞതിനാണ് കണ്ടക്ടറെ എസ്.ഐ ക്രൂരമായി മര്‍ദിക്കുകയും പണം കൈക്കലാക്കുകയും ചെയ്തതെന്ന് ഭാരവാഹികള്‍ ആരോപിച്ചു. യോഗത്തില്‍ നേതാക്കളായ അജയന്‍ പായം, വി.പി പോള്‍, പി. ചന്ദ്രന്‍, കെ.എന്‍ അച്യുതന്‍, അമ്പാടി, പ്രകാശന്‍ പങ്കെടുത്തു.