നെടുമ്പാശേരി: അന്താരാഷ്ട്ര വിമാനത്താവളത്തില്‍ കസ്റ്റംസ് എയര്‍ ഇന്റെലിജന്‍സ്, ഡയറക്ടറേറ്റ് ഓഫ് റവന്യു ഇന്റലിജന്‍സ് വിഭാഗങ്ങളുടെ സ്വര്‍ണവേട്ട തുടരുന്നു. ഒന്നര കിലോഗ്രാം സ്വര്‍ണമിശ്രിതമാണ് ഇന്ന് ഡയറക്ടറേറ്റ് ഓഫ്റവന്യുഇന്റലിജന്‍സ് വിഭാഗത്തിന്റെ പിടിയിലായത്. ഇതുമായി ബന്ധപ്പെട്ട് രണ്ടുപേരെ കസ്റ്റഡിയിലെടുത്തു. ഷാര്‍ജയില്‍ നിന്നും വന്ന മുഹമ്മദ് ആഷിക്ക്, ഹരീഷ് എന്നിവരില്‍ നിന്നാണ്ഏകദേശം40ലക്ഷത്തിലേറെരൂപവില വരുന്നസ്വര്‍ണം പിടികൂടിയത്.

മുന്‍കൂട്ടി വിവരം ലഭിച്ചതിന്റെ അടിസ്ഥാനത്തിലാണ് ഡി.ആര്‍.ഐ വിഭാഗം ഉദ്യോഗസ്ഥര്‍ പരിശോധനക്കെത്തിയത്. കഴിഞ്ഞ ഒരു മാസത്തിനിടെ 22 കേസുകളിലായി അഞ്ചര കോടി രൂപയുടെ സ്വര്‍ണമാണ് നെടുമ്പാശേരിയില്‍ മാത്രം കസ്റ്റംസ് വിഭാഗം പിടികൂടിയത്. 15.2 കിലോഗ്രാം സ്വര്‍ണം പിടിച്ചെടുത്തിട്ടുണ്ട്. മുന്‍കാലങ്ങളില്‍ നിന്നും വ്യത്യസ്ഥമായി അതിനൂതന മാര്‍ഗ്ഗങ്ങളാണ് സ്വര്‍ണം കടത്താന്‍ കള്ളക്കടത്ത് സംഘങ്ങള്‍ സ്വീകരിക്കുന്നത്. ഇതില്‍ മിശ്രിത രൂപത്തില്‍ സ്വര്‍ണം കടത്താനാണ് ഏറ്റവും കൂടുതല്‍ ശ്രമം നടക്കുന്നത്.