കൊണ്ടോട്ടി: സാമൂഹ്യസുരക്ഷാ പെന്‍ഷന്‍ മസ്റ്ററിങ്ങിനുള്ള സമയപരിധി തീരാന്‍ നാലുദിവസം മാത്രം ബാക്കിനില്‍ക്കെ സംസ്ഥാനത്ത് മസ്റ്ററിങ് നടത്താന്‍ ബാക്കിയുള്ളത് 9,11,278 പേര്‍. ഈ മാസം 15 വരെയാണ് മസ്റ്ററിങ് നടത്താനുള്ള സമയപരിധി നിശ്ചയിച്ചിട്ടുള്ളത്. മസ്റ്ററിങ് നടത്താത്തവര്‍ക്ക് ജനുവരി മുതല്‍ പെന്‍ഷന്‍ ലഭിക്കില്ല. സാമൂഹ്യസുരക്ഷാ പെന്‍ഷനുപുറമെ 28 വെല്‍ഫയര്‍ ഫണ്ട് ബോര്‍ഡ് തലത്തിലുള്ള പെന്‍ഷന്‍ ഗുണഭോക്താക്കളില്‍ 3,54,294 പേരും മസ്റ്ററിങ് നടത്തിയിട്ടില്ല.10,43,438 പേരാണ് വിവിധ ബോര്‍ഡുകളിലെ പെന്‍ഷന്‍ കൈപ്പറ്റുന്നവര്‍. ഇവരില്‍ 6,89,180 പേരാണ് മസ്റ്ററിങ് നടത്തിയത്.
7348 പേര്‍ മസ്റ്ററിങിന് ശ്രമം നടത്തിയെങ്കിലും സാങ്കേതികകാരണങ്ങളാല്‍ നടത്താനായിട്ടില്ല. ഇവരോട് വില്ലേജ് ഓഫിസറോ ഗസ്റ്റഡ് ഓഫിസറോ നല്‍കുന്ന സാക്ഷ്യപത്രം സമര്‍പ്പിക്കാന്‍ ആവശ്യപ്പെട്ടിട്ടുണ്ട്. കൈവിരലുകളില്ലാത്തവര്‍, കണ്ണിന് പ്രശ്‌നങ്ങളുള്ളവര്‍ എന്നിവരാണ് ഇവരില്‍ കൂടുതല്‍.
മസ്റ്ററിങ് പൂര്‍ത്തീകരണത്തിന് തദ്ദേശ സ്ഥാപനങ്ങളില്‍ പ്രത്യേക ക്യാംപുകളും അക്ഷയ കേന്ദ്രങ്ങളില്‍ സൗകര്യവും ഒരുക്കിയിരുന്നു. കിടപ്പിലായ രോഗികള്‍ക്കും മറ്റുമായി ഇന്നലെ മുതല്‍ വീടുകളിലെത്തി മസ്റ്ററിങ് നടത്തുന്ന പ്രവൃത്തികള്‍ ആരംഭിച്ചിട്ടുണ്ട്.
സംസ്ഥാനത്ത് സാമൂഹ്യസുരക്ഷാ പെന്‍ഷന്‍ കൈപ്പറ്റുന്നത് 47,21,195 പേരാണ്. ഇവരില്‍ 38,09,917 പേര്‍ മസ്റ്ററിങ് നടത്തിയിട്ടുണ്ട്. തിരുവനന്തപുരം, മലപ്പുറം ജില്ലകളിലാണ് കൂടുതല്‍ പേര്‍ മസ്റ്ററിങ് നടത്താനുള്ളത്. തിരുവനന്തപുരത്ത് ആകെയുള്ള 4,95,486 പേരില്‍ 3,95,694 പേരാണ് മസ്റ്ററിങ് പൂര്‍ത്തീകരിച്ചത്. 99,792 പേര്‍ മസ്റ്ററിങ് പൂര്‍ത്തീകരിക്കാനുണ്ട്. മലപ്പുറത്ത് ആകെയുള്ള 4,85,507 പേരില്‍ 94,820 പേര്‍ മസ്റ്ററിങ് നടത്താനുണ്ട്. വയനാട്ടിലാണ് മസ്റ്ററിങ് പൂര്‍ത്തീകരിച്ചവര്‍ കൂടുതലുള്ളത്. 1,13,474 പേരില്‍ 23,225 പേര്‍ മാത്രമാണ് പൂര്‍ത്തീകരിക്കാനുള്ളത്.
മറ്റുജില്ലകളിലെ കണക്ക്. ബ്രായ്ക്കറ്റില്‍ പൂര്‍ത്തീകരിക്കാത്തവര്‍. കൊല്ലം 4,10,449 (75,866), പത്തനംതിട്ട 1,81,199 (36,655), ആലപ്പുഴ 3,30,516 (66,571), കോട്ടയം 2,66,423 (51, 929), ഇടുക്കി 1,54,379 (27,070), എറണാകുളം 4,23,077 (82,158), തൃശൂര്‍ 4,62,445 (79,143), പാലക്കാട് 4,23,446 (70,019), കോഴിക്കോട് 4,16,408 (89,872), കണ്ണൂര്‍ 3,81,801 (72,789), കാസര്‍കോട് 1,35,516 (41,069).