ഫ്‌ളോറിഡ: ഫ്‌ളോറിഡയിലെ യു. എസ് നാവികസേനാ കേന്ദ്രത്തില്‍ വിമാനം പറത്തുന്നതില്‍ പരിശീലനം നേടുകയായിരുന്ന സഊദി വിദ്യാര്‍ഥി മൂന്നുപേരെ വെടിവച്ചു കൊന്ന സംഭവവുമായി ബന്ധപ്പെട്ട് യു.എസ് സഊദി വിദ്യാര്‍ഥികള്‍ക്കു സൈനികപരിശീലനം നല്‍കുന്നത് താല്‍ക്കാലികമായി നിര്‍ത്തിവച്ചു. പെന്റഗണിന്റെ തീരുമാന പ്രകാരമാണിത്. നിലവില്‍ 300 സഊദി വിദ്യാര്‍ഥികളാണ് ഇവിടെ പരിശീലനം നേടുന്നത്. അതേസമയം യു.എസില്‍ പരിശീലനം നേടുന്ന 900 സഊദി വിദ്യാര്‍ഥികളെ വിലക്ക് ബാധിക്കും.
21കാരനായ സഊദി വിദ്യാര്‍ഥി കഴിഞ്ഞ വെള്ളിയാഴ്ച ക്ലാസ് റൂമിലാണ് വെടിവയ്പു നടത്തിയത്. അതേസമയം വിദ്യാര്‍ഥി തനിച്ചാണ് ആക്രമണം നടത്തിയതെന്നും ഇതില്‍ ഗൂഢാലോചനയില്ലെന്നും യു.എസ് ഉദ്യോഗസ്ഥന്‍ പറഞ്ഞു. യു.എസ് സൈനികകേന്ദ്രത്തില്‍ വിദേശ വിദ്യാര്‍ഥികള്‍ക്ക് പരിശീലനം നല്‍കുന്നതിനു മുന്‍പ് മതിയായ പരിശോധനകള്‍ നടത്തുമെന്ന് അദ്ദേഹം അറിയിച്ചു.