പുത്തനത്താണി: കളഞ്ഞുകിട്ടിയ ആഭരണം തിരിച്ചുനല്‍കി യുവാവ് മാതൃകയായി. ഇന്നലെ ഉച്ചക്ക് കടുങ്ങാത്തുകുണ്ട് വരമ്പനാല സ്വദേശിനി കുന്നത്ത് നസീലയുടെ 10 പവന്‍ സ്വര്‍ണവും 1700 രൂപയുമടങ്ങുന്ന ബാഗ് കടുങ്ങാത്തുകുണ്ട് - തെയ്യാല യാത്രക്കിടയില്‍ നഷ്ടപെട്ടിരുന്നു.
യാത്ര ചെയ്തിരുന്ന വാഹനം എസ്റ്റേറ്റ്പടിയില്‍ എത്തിയപ്പോള്‍ വാഹനത്തില്‍ നിന്നും തെറിച്ചു വീണ ബാഗ് പുറകെ കാറില്‍ വരികയായിരുന്ന വൈലത്തൂര്‍ ഈങ്ങാപടലില്‍ കുഞ്ഞീന്‍ മകന്‍ അഹമ്മദ് അക്ബറിനു കിട്ടുകയും വിവരം അടുത്തുള്ള കടയില്‍ അറിയിക്കുകയും ചെയ്തു. അന്വേഷണത്തില്‍ ഉടമ വരമ്പനാല സ്വദേശിനി കുന്നത്ത് നസീലയെ കണ്ടെത്തി. കല്‍പകഞ്ചേരി സബ് ഇന്‍സ്‌പെക്ടര്‍ എസ് കെ പ്രിയന്റെ സാന്നിധ്യത്തില്‍ ആഭരണം കൈമാറി.