ടെംപരെ (ഫിന്‍ലന്‍ഡ്): ലോക ജൂനിയര്‍ ഗുസ്തി ചാംപ്യന്‍ഷിപ്പില്‍ ഇന്ത്യക്ക് ആദ്യ മെഡല്‍. ഒന്നാം ദിനത്തില്‍ നടന്ന പുരുഷന്‍മാരുടെ 74 കിലോ ഫ്രീസ്റ്റൈലില്‍ ഇന്ത്യയുടെ വീര്‍ ദേവ് ഗുലിയ വെങ്കലം സ്വന്തമാക്കി. വെങ്കല മെഡല്‍ നിര്‍ണയ പോരാട്ടത്തില്‍ ജപ്പാന്റെ യമസകി യജുരോയെ പരാജയപ്പെടുത്തിയാണ് ഗുലിയ വിജയവും ഒപ്പം വെങ്കലവും നേടിയത്. അഞ്ചിനെതിരേ എട്ട് പോയിന്റുകള്‍ക്കാണ് ഗുലിയ വിജയിച്ചത്. ക്വാര്‍ട്ടറില്‍ തോറ്റ് റെപെഷാഗെ പോരാട്ടത്തിലെത്തിയ ഗുലിയ കാനഡയുടെ ടൈ സ്റ്റുവര്‍ട് ബ്രിഡ്ജ്‌വാടറിനെ 5-0ത്തിന് കീഴടക്കിയാണ് വെങ്കല നിര്‍ണയ പോരാട്ടത്തിനെത്തിയത്.
ക്വാര്‍ട്ടറില്‍ ഗുലിയയെ വീഴ്ത്തിയ ഉസ്‌ബെകിസ്താന്‍ താരം ഇസ ഷാപിയേവിനാണ് ഈയിനത്തില്‍ സ്വര്‍ണം. നേരത്തെ 60 കിലോ ഫ്രീസ്റ്റൈല്‍ വെങ്കല മെഡല്‍ പോരാട്ടത്തില്‍ ഇന്ത്യയുടെ രവിന്ദര്‍ എത്തിയിരുന്നെങ്കിലും ജപ്പാന്‍ താരം ഹിരോമു സകാകിയോട് പരാജയപ്പെട്ടു.