അശ്‌റഫ് കൊണ്ടോട്ടി #

കൊണ്ടോട്ടി: അന്തര്‍ദേശീയ വിമാന സര്‍വിസുകളുമായി ബന്ധപ്പെട്ട് രാജ്യങ്ങള്‍ തമ്മിലുള്ള ഉഭയകക്ഷി കരാര്‍ പുതുക്കുന്നതിനുള്ള ആഗോള സംഗമം ഇന്നു മുതല്‍ 14 വരെ അഫ്രിക്കന്‍ രാജ്യമായ കെനിയയില്‍ നടക്കും. ഇന്ത്യയുള്‍പ്പെടെ 140 ലോക രാജ്യങ്ങള്‍ പങ്കെടുക്കുന്ന സംഗമത്തില്‍ നിലവിലുള്ള വിമാന സര്‍വിസുകളുമായി ബന്ധപ്പെട്ട കരാറുകളും പൊളിച്ചെഴുതിയേക്കും. ഒരു രാജ്യത്ത് നിന്ന് മറ്റൊരു രാജ്യത്തേക്ക് വിമാന സര്‍വിസ് നടത്തണമെങ്കില്‍ ഇരുരാജ്യങ്ങളും തമ്മില്‍ ഉഭയകക്ഷി കരാറില്‍ ഏര്‍പ്പെടണമെന്നാണ് ചട്ടം. മൂന്ന് വര്‍ഷത്തിന് ശേഷം നടക്കുന്ന കരാര്‍ പുതുക്കലില്‍ ഇന്ത്യന്‍ വ്യോമപാതയില്‍ കണ്ണുംനട്ടിരിക്കുകയാണ് വിദേശ വിമാന കമ്പനികള്‍. ഓരോ രാജ്യങ്ങളുടേയും സിവില്‍ ഏവിയേഷന്‍ മന്ത്രാലയങ്ങള്‍ തമ്മിലാണ് കരാര്‍ ഒപ്പുവയ്ക്കുക.
പുതിയ കരാറില്‍ വിമാന സീറ്റുകള്‍ വീതംവച്ചു കിട്ടിയില്ലെങ്കില്‍ വിദേശ വിമാനങ്ങളുടെ അനുമതി കാത്ത് കിടക്കുന്ന കണ്ണൂര്‍ ഉള്‍പ്പെടെയുള്ള വിമാനാത്തവളങ്ങളില്‍നിന്ന് പുതിയ സര്‍വിസ് തുടങ്ങാനാവില്ല. എമിറേറ്റ്‌സ്, ഖത്തര്‍, സഊദി, ഒമാന്‍ തുടങ്ങിയ വിമാന കമ്പനികള്‍ക്കൊന്നും നിലവിലെ ഉഭയകക്ഷി കരാര്‍ പ്രകാരം ഇന്ത്യയിലേക്ക് സീറ്റുകളില്ല. ഏഷ്യന്‍ രാജ്യങ്ങളുമായി ഒപ്പുവച്ചത് പോലെ ഓപ്പണ്‍ കരാറുകള്‍ ഇന്ത്യയും ഗള്‍ഫ് രാജ്യങ്ങളുമായി സാധ്യമായാല്‍ നിലവിലെ പ്രശ്‌നങ്ങള്‍ക്ക് അറുതിയാകുമെന്നും ചൂണ്ടിക്കാണിക്കപ്പെടുന്നു.
ഉഭയകക്ഷി കരാറില്‍ ഒരു ഏകീകൃത നയം നടപ്പില്‍ വരുത്തിയാല്‍ ഉപയോഗിക്കാതെ ഒഴിഞ്ഞ് കിടക്കുന്ന സീറ്റുകള്‍ വിമാന കമ്പനികള്‍ക്ക് പരസ്പരം കൈമാറ്റം ചെയ്യാനാകും. എന്നാല്‍ ഇതിന് ഇന്ത്യ തയാറാവുന്നില്ലെന്നാണ് വിദേശ വിമാന കമ്പനികളുടെ പരാതി. കരാര്‍ വ്യവസ്ഥ പുതുക്കിയാല്‍ ഇന്ത്യന്‍ വിമാന കമ്പനികളുടെ വരുമാനത്തില്‍ ഗണ്യമായ കുറവ് വരുമെന്ന ആശങ്കയാണ് കേന്ദ്ര വ്യോമയാന മന്ത്രാലയത്തിനുള്ളത്.
ഇന്ത്യയും യു.എ.ഇയും തമ്മില്‍ നാലു വ്യത്യസ്ത ഉഭയകക്ഷി കരാറുകളാണ് നിലവിലുള്ളത്. ഇന്ത്യയും യു.എ.ഇയും 1,34,441 സീറ്റുകളാണ് പരസ്പരം കൈമാറുന്നത്. ഇന്ത്യയും സഊദി അറേബ്യയും തമ്മിലുള്ള കരാര്‍ പ്രകാരം ആഴ്ചയില്‍ ഇരുപതിനായിരം സീറ്റുകളാണ് വ്യോമയാന പാതയിലുള്ളത്.
ഇത് വര്‍ധിപ്പിച്ചാല്‍ മാത്രമേ സഊദി എയര്‍ലൈന്‍സ് ഉള്‍പ്പെടെയുള്ള വിമാന കമ്പനികള്‍ക്ക് കൂടുതല്‍ സര്‍വിസ് ഇന്ത്യയിലേക്ക് നടത്താന്‍ കഴിയുകയുള്ളൂ. ഒമാനും ഇന്ത്യയുമായുള്ള ഉഭയകക്ഷികരാര്‍ പ്രകാരം ഓരോരുത്തര്‍ക്കും 21,149 സീറ്റുകളാണ് ആഴ്ചയില്‍ ഉപയോഗിക്കാനുള്ള അനുമതിയുള്ളത്.