തിരുവനന്തപുരം: കൊച്ചി കപ്പല്‍ നിര്‍മാണ ശാലയില്‍ നിര്‍മാണത്തിലിരിക്കുന്ന വിമാനവാഹിനി കപ്പല്‍ ഐ.എന്‍.എസ് വിക്രാന്തില്‍നിന്ന് കംപ്യൂട്ടര്‍ ഹാര്‍ഡ് ഡിസ്‌ക്കുകള്‍ മോഷണം പോയതിനെക്കുറിച്ചുള്ള അന്വേഷണം മിലിട്ടറി ഇന്റലിജന്‍സ് ഏറ്റെടുത്തേക്കും. അതീവ ഗുരുതര സുരക്ഷാ വീഴ്ചയായി കരുതുന്ന വിഷയത്തില്‍ ലോക്കല്‍ പൊലിസും എന്‍.ഐ.എയും അന്വേഷിക്കുന്നുണ്ടെങ്കിലും ഇതുവരെ യാതൊരു പുരോഗതിയും ഉണ്ടാകാത്ത സാഹചര്യത്തിലാണ് മിലിട്ടറി ഇന്റലിജന്‍സിനെക്കൊണ്ട് അന്വേഷണം നടത്തുന്നത് സംബന്ധിച്ച് ആലോചന നടക്കുന്നത്. 

കൊച്ചി കപ്പല്‍ ശാലയിലെ താല്‍ക്കാലിക ജീവനക്കാര്‍ ഉള്‍പ്പെടെയുള്ളവരുടെ വിരലടയാളം പരിശോധിക്കുന്നതിന് നേരത്തെ എന്‍.ഐ.എ തീരുമാനിച്ചിരുന്നു. ഇതിന്റെ ഭാഗമായി 4600 ഓളം ജീവനക്കാരുടെ വിരലടയാളം ഇതുവരെ പരിശോധിച്ചെങ്കിലും ഒരു തെളിവും ലഭിച്ചിട്ടില്ല. 

സാധാരണ തൊഴിലാളികളുടെ വിരലടയാളമാണ് ഇതുവരെ പരിശോധിച്ചത്. എന്നാല്‍ ഉദ്യോഗസ്ഥ തലത്തിലുള്ളവരിലേക്ക് ഇതുവരെ അന്വേഷണം എത്തിയിട്ടില്ല. വിരലടയാളം പരിശോധിക്കുന്നതിന് സംസ്ഥാന ഫൊറന്‍സിക് വിഭാഗമാണ് എന്‍.ഐ.എയെ സഹായിക്കുന്നത്. സെപ്റ്റംബര്‍ പകുതിയോടെ തുടങ്ങിയ അന്വേഷണത്തില്‍ ഇതുവരെ യാതൊരു പുരോഗതിയും ഇല്ലാത്തതിനാല്‍ എന്‍.ഐ.എയുടെ ഭാഗത്തും കാര്യക്ഷമമായ നടപടികളില്ല. അതുകൊണ്ടാണ് ഇത്രയും ഗുരുതരമായ കുറ്റകൃത്യത്തെക്കുറിച്ച് അന്വേഷിക്കാന്‍ മിലിട്ടറി ഇന്റലിജന്‍സിന്റെ സഹായം തേടാന്‍ ആലോചന നടക്കുന്നത്. 

ഐ.എന്‍.എസ് വിക്രാന്തില്‍നിന്നും നാല് കംപ്യൂട്ടറുകളിലെ ഹാര്‍ഡ് ഡിസ്‌കുകളാണ് മോഷണം പോയത്. ഇത്രയും ഗുരുതരമായ സുരക്ഷാ വീഴ്ചയുണ്ടായിട്ടും അന്വേഷണം നടത്തി കുറ്റക്കാരെ കണ്ടെത്തുന്ന കാര്യത്തിലുള്ള നിസ്സംഗത ദുരൂഹമാണ്.