ന്യൂഡല്‍ഹി: സംസ്‌കൃതഭാഷ നിത്യേന ഉപയോഗിക്കുന്നത് നാഡികളെ ഉത്തേജിപ്പിക്കുകയും അതുവഴി പ്രമേഹവും കൊളസ്‌ട്രോളും ഇല്ലാതാകുമെന്നും ബി.ജെ.പി മന്ത്രി. മധ്യപ്രദേശില്‍ നിന്നുള്ള പാര്‍ലമെന്റ്അംഗം ഗണേഷ് സിങാണ് ലോക്‌സഭയില്‍ ഇക്കാര്യം പറഞ്ഞത്. യു.എസ് ആസ്ഥാനമായ ഗവേഷണ സ്ഥാപനം നടത്തിയ പഠനത്തിലാണ് ഇക്കാര്യങ്ങള്‍ തെളിഞ്ഞതെന്ന് ഗണേഷ് സിങ് അവകാശപ്പെടുന്നു.

ലോക്‌സഭയില്‍ കേന്ദ്ര സംസ്‌കൃത സര്‍വകലാശാല ബില്ലിനെക്കുറിച്ചുള്ള ചര്‍ച്ചയില്‍ പങ്കെടുത്തു സംസാരിക്കവെയായിരുന്നു മന്ത്രിയുടെ പരാമര്‍ശം.

സംസ്‌കൃതം സംസാരിക്കുന്നതുകൊണ്ട് ആരോഗ്യപരമായി ഒരുപാട് ഗുണങ്ങളുണ്ടെന്നും കംപ്യൂട്ടര്‍ പ്രോഗാമുകള്‍ സംസ്‌കൃതത്തില്‍ ചെയ്താല്‍ കുറ്റമറ്റതാകുമെന്ന് 'നാസ' കണ്ടെത്തിയിട്ടുണ്ടെന്നും ഗണേഷ് സിങ് പറഞ്ഞു. ഇസ്‌ലാമിക് ഭാഷകളുള്‍പ്പെടെ 97 ശതമാനം ഭാഷകളിലും സംസ്‌കൃതം അടിസ്ഥാനമായിരിക്കുന്നുവെന്നും സിങ് പറഞ്ഞു.