ന്യൂഡല്‍ഹി: പൗരത്വ ഭേദഗതി ബില്ലിനെതിരെ രാജ്യവ്യാപകമായി നടക്കുന്ന പ്രക്ഷോഭം ഡല്‍ഹിയിലെത്തിയത് ജാമിഅ മില്ലിയ്യ യൂനിവേഴ്‌സിറ്റി വിദ്യാര്‍ഥികളിലൂടെ. പ്രധാന കവാടത്തിനു മുന്നില്‍ ആയിരക്കണക്കിന് വിദ്യാര്‍ഥികള്‍ ഒത്തുകൂടി പ്രതിഷേധിച്ചു. ഇതോടെ റോഡ് സ്തംഭിക്കുകയും ഗതാഗതം മണിക്കൂറുകളോളം തടസ്സപ്പെടുകയും ചെയ്തു.

[video width="640" height="352" mp4="http://suprabhaatham.com/wp-content/uploads/2019/12/WhatsApp-Video-2019-12-13-at-5.42.59-PM.mp4"][/video]

വിദ്യാര്‍ഥികളെ പിരിച്ചുവിടാന്‍ പൊലിസ് ലാത്തിചാര്‍ജ്ജ് നടത്തി. നിരവധി വിദ്യാര്‍ഥികളെ പരുക്കുകളോടെ ആശുപത്രിയില്‍ പ്രവേശിപ്പിച്ചു.

വിദ്യാര്‍ഥികളുടെ ഭാഗത്തു നിന്ന് കല്ലേറുണ്ടായെന്ന് ആരോപിച്ച് പൊലിസ് കണ്ണീര്‍ വാതകം പ്രയോഗിച്ചു. പ്രതിഷേധ മാര്‍ച്ചിന് അനുമതിയില്ലെന്ന് ചൂണ്ടിക്കാണിച്ച് തടയാന്‍ ശ്രമിച്ചതും സംഘര്‍ഷത്തിനിടയാക്കി. നിരവധി വിദ്യാര്‍ഥികളെ പൊലിസ് അറസ്റ്റ് ചെയ്തു കൊണ്ടുപോയി.

'യൂനിവേഴ്‌സിറ്റി ക്യാംപസില്‍ നിന്ന് പാര്‍ലമെന്റിലേക്ക്' എന്നാണ് വിദ്യാര്‍ഥികള്‍ പോസ്റ്ററില്‍ എഴുതിയിരിക്കുന്നത്. എന്നാല്‍ അധികദൂരം കടക്കാന്‍ പൊലിസ് അനുവദിച്ചില്ല. യൂനിവേഴ്‌സിറ്റിക്ക് അടുത്തു തന്നെ തടയുകയും ഇതോടെ സംഘര്‍ഷമുണ്ടാവുകയും ചെയ്തു.

[video width="640" height="352" mp4="http://suprabhaatham.com/wp-content/uploads/2019/12/WhatsApp-Video-2019-12-13-at-5.53.33-PM.mp4"][/video]

രണ്ടായിരത്തോളം വിദ്യാര്‍ഥികളാണ് പ്രതിഷേധ മാര്‍ച്ചില്‍ അണിനിരന്നത്. മാര്‍ച്ച് തടയാന്‍ പൊലിസ് സ്ഥാപിച്ച ബാരിക്കേഡുകള്‍ വിദ്യാര്‍ഥികള്‍ മറികടക്കാന്‍ ശ്രമിക്കുകയും ചെയ്തു. എന്നാല്‍ പൊലിസ് തടയുകയും ലാത്തിചാര്‍ജ്ജ് നടത്തുകയും ചെയ്തു. ഇതോടെ ക്യാംപസിനുള്ളിലേക്ക് വിദ്യാര്‍ഥികള്‍ പിരിഞ്ഞെങ്കിലും ക്യാംപസിനുള്ളിലേക്ക് പൊലിസ് കണ്ണീര്‍വാതക പ്രയോഗം നടത്തി.

പ്രക്ഷോഭത്തെ തുടര്‍ന്ന് ഡെല്‍ഹി മെട്രോ പട്ടേല്‍ ചൗക്കിലെയും ജന്‍പതിലെയും കവാടങ്ങള്‍ അടച്ചിട്ടു. ഈ സ്റ്റേഷനുകളില്‍ മെട്രോ ട്രെയിനുകള്‍ നിര്‍ത്താതെ ഓടി.