ഇസ്‌ലാമാബാദ്: പാകിസ്താനെ 2022ഓടെ പോളിയോമുക്തമാക്കാന്‍ യു.എ.ഇ ഭരണകൂടം സഹായിക്കുമെന്ന് പാകിസ്താനിലെ യു.എ.ഇ സ്ഥാനപതി അറിയിച്ചു. എമിറേറ്റ്‌സ് പോളിയോ കാംപയിന്റെ ഭാഗമായാണിത് ചെയ്യുക. പാക് പ്രധാനമന്ത്രി രാജ്യത്ത് പുതിയ കുത്തിവയ്പിന് തയാറെടുക്കുന്നതിനിടെയാണ് യു.എ.ഇ അംബാസഡര്‍ ഹമദ് ഉബൈദ് അല്‍ സാബി ഇക്കാര്യം അറിയിച്ചത്.
ലോകത്ത് പോളിയോ അവശേഷിക്കുന്ന രണ്ടു രാജ്യങ്ങള്‍ പാകിസ്താനും അഫ്ഗാനിസ്ഥാനുമാണ്. പാകിസ്താനില്‍ 77 പോളിയോ കേസുകളും അഫ്ഗാനില്‍ 19 കേസുകളുമാണുള്ളതെന്നാണ് ഏറ്റവും പുതിയ കണക്കുകള്‍ പറയുന്നത്.
ഈമാസം 16നാണ് പാകിസ്താനില്‍ പോളിയോ വിരുദ്ധ പ്രചാരണം ആരംഭിക്കുന്നത്. യു.എ.ഇയും ഇതില്‍ സഹായിക്കും. പ്രചാരണത്തിനു പുറമെ സാമ്പത്തിക സഹായവും യു.എ.ഇ നല്‍കും. വിദ്യാഭ്യാസം, അടിസ്ഥാനസൗകര്യ വികസനം, ശുദ്ധജലം, ആരോഗ്യം തുടങ്ങിയ രംഗങ്ങളിലെല്ലാം യു.എ.ഇ പാകിസ്താനെ സഹായിക്കുന്നുണ്ട്.