മീനങ്ങാടി: ആലപ്പുഴയില്‍ സമാപിച്ച സംസ്ഥാന സ്‌കൂള്‍ കലോത്സവത്തില്‍ ഹയര്‍ സെക്കന്‍ഡറി വിഭാഗത്തില്‍ മീനങ്ങാടി ഗവ.ഹയര്‍ സെക്കന്‍ഡറി സ്‌കൂളിന് മൂന്നാം സ്ഥാനം.
68 പോയന്റാണ് സ്‌കൂള്‍ നേടിയത്. 17 ഇനങ്ങളിലായി സ്‌കൂളിലെ 24 വിദ്യാര്‍ഥികളാണ് സംസ്ഥാന തല മത്സരത്തില്‍ പങ്കെടുത്തത്. നാല് ഇനങ്ങളില്‍ ഒന്നാംസ്ഥാനവും ഒരു ഇനത്തില്‍ രണ്ടാം സ്ഥാനവും ,രണ്ട് ഇനങ്ങളില്‍ മൂന്നാം സ്ഥാനവും കരസ്ഥമാക്കി. ലളിതഗാനത്തില്‍ ഒന്നാം സ്ഥാനവും ശാസ്ത്രീയ സംഗീതത്തില്‍ എ ഗ്രേഡും ലഭിച്ച സാന്ദ്ര ബാലന്‍, ഇംഗ്ലീഷ് പ്രസംഗത്തില്‍ ഒന്നാം സ്ഥാനവും ഇംഗ്ലീഷ് പദ്യം ചൊല്ലലില്‍ രണ്ടാം സ്ഥാനവും ലഭിച്ച ആന്‍സില ജോസഫ്, ഓട്ടന്‍ തുള്ളലില്‍ ഒന്നാം സ്ഥാനം നേടിയ എ.ആര്‍ ലക്ഷ്മി, കാര്‍ട്ടൂണില്‍ ഒന്നാം സ്ഥാനം നേടിയ എസ്. ശ്രീറാം എന്നിവരുടെതാണ് ശ്രദ്ധേയമായ നേട്ടം.  പൂജാ ശശീന്ദ്രന്‍ (മലയാളം കഥാ രചന മൂന്നാം സ്ഥാനം), അബിസിനാന്‍ (ഓട്ടന്‍തുള്ളലില്‍ മൂന്നാം സ്ഥാനം), കൃഷ്ണപ്രിയ (കുച്ചുപ്പുടി, മോഹിനിയാട്ടം), കെ.എസ് വിഷ്ണുമായ(സംസ്‌കൃതം ഉപന്യാസം ,സംസ്‌കൃതം പ്രസംഗം), അപര്‍ണ ലക്ഷ്മി, റോബിന്‍ സാജു, ഗോഡ് വിന്‍ സോജ്, അഷര്‍ ഫ്രാന്‍സിസ്, എ.എസ് അനാമിക, കെ ഗിരിധര്‍ കൃഷ്ണ ,എം.എസ്അശ്വിന്‍ ദേവ് (വൃന്ദവാദ്യം) എന്നിവരാണ് എ ഗ്രേഡ് നേടിയത്. അപര്‍ണ ലക്ഷ്മിക്ക് വയലിനില്‍ ബി.ഗ്രേഡും സഞ്ജയ് കനകന് മൃദംഗത്തില്‍ സി. ഗ്രേഡും ലഭിച്ചു. വിജയികളെ അധ്യാപക രക്ഷാകര്‍ത്തൃസമിതിയുടെയും സ്റ്റാഫ് കൗണ്‍സിലിന്റെയും ആഭിമുഖ്യത്തില്‍ അനുമോദിച്ചു.