കുറ്റ്യാടി: നിര്‍ധന കുടുംബത്തിന് യൂത്ത് ലീഗിന്റെ സന്നദ്ധ സേവന സംഘമായ വൈറ്റ് ഗാര്‍ഡിന്റെ സഹായം. നരിക്കൂട്ടുംചാല്‍ കൂരാറക്കുന്നിലെ ഒരു കുടുംബത്തിനാണ് പഞ്ചായത്ത് വൈറ്റ് ഗാര്‍ഡ് ടീം സഹായമൊരുക്കി രംഗത്തെത്തിയത്.
കുടുംബത്തിന്റെ കുറേ നാളത്തെ ആഗ്രഹമായിരുന്നു ഇടിഞ്ഞു വീഴാറായ മണ്‍കട്ടയിലുള്ള വീട് പുനര്‍നിര്‍മിക്കുക എന്നത്. അതിനായി പഞ്ചായത്തിന്റെ ലൈഫ് ഭവന പദ്ധതിയില്‍ ഉള്‍പെടുത്തി ആവശ്യമായ സഹായം ലഭിച്ചെങ്കിലും വീട് പൊളിച്ചുമാറ്റി പുതിയ വീടിന്റെ പ്രാരംഭ പ്രവര്‍ത്തനങ്ങള്‍ തുടങ്ങിയാലേ പണം ലഭ്യമാവൂ എന്ന നടപടിക്രമം വീടെന്ന സ്വപ്നത്തിന് വിലങ്ങുതടിയായിമാറി.
ഈ സാഹചര്യത്തിലാണ് ആവശ്യ സാധനങ്ങള്‍ വേര്‍തിരിച്ചു വീടു പൊളിച്ചു മാറ്റാനുള്ള ദൗത്യം യൂത്ത് ലീഗ് വൈറ്റ് ഗാര്‍ഡ് ടീം ഏറ്റെടുത്തത്. പഞ്ചായത്ത് യൂത്ത് ലീഗ് പ്രസിഡന്റ് ഷൗക്കത്ത് വടയം, വൈറ്റ് ഗാര്‍ഡ് കോഡിനേറ്റര്‍ കെ.പി മുഹമ്മദ്, വൈറ്റ് ഗാര്‍ഡ് ക്യാപ്റ്റന്‍ കെ.ടി സവാദ് നേതൃത്വം നല്‍കി.