മെഡിക്കല്‍കോളജ്: സ്‌കൂളിനുള്ളിലും കുട്ടികള്‍ ലഹരി ഉപയോഗിക്കുന്നുവെന്നത് രക്ഷിതാക്കളെ ആശങ്കയിലാക്കുന്നു.
മെഡിക്കല്‍ കോളജ് പരിസരത്തെ പ്രധാന സര്‍ക്കാര്‍ സ്‌കൂളിലാണ് കുട്ടികള്‍ക്കിടയില്‍  കഞ്ചാവ് ഉള്‍പ്പടെയുള്ള ലഹരി ഉപയോഗം വര്‍ധിച്ചിരിക്കുന്നത്. സ്‌കൂളിലെ ചില മുതിര്‍ന്ന വിദ്യാര്‍ഥികള്‍ക്കു കഞ്ചാവ് മാഫിയയുമായി അടുത്ത ബന്ധം ഉള്ളതായി പറയപ്പെടുന്നു. കഴിഞ്ഞ പി.ടി.എ യോഗത്തില്‍ ചില രക്ഷിതാക്കള്‍ കഞ്ചാവ് മാഫിയയെക്കുറിച്ച് സ്‌കൂള്‍ അധികൃതര്‍ക്കു വിവരം നല്‍കിയിരുന്നു. സ്‌കൂളിലെ  മൂത്രപ്പുരകളില്‍  സിഗരറ്റ് കുറ്റികളും ലഹരിപദാര്‍ഥങ്ങളുടെ ഒഴിഞ്ഞ
കവറുകളും കൂടി കിടക്കുന്നുണ്ട്. വീര്യം കൂട്ടുന്നതിനായി പാദരക്ഷികള്‍ ഒട്ടിക്കുന്ന പശ, ഇനാമല്‍ പെയിന്റ്, വൈറ്റ്‌നര്‍ തുടങ്ങിയവ പോലും വിദ്യാര്‍ഥികള്‍ ഉപയോഗിക്കുന്നതായി രക്ഷിതാക്കള്‍ പറയുന്നു.
ക്ലാസലിരിക്കുമ്പോള്‍ പേപ്പറിനുള്ളില്‍ വൈറ്റ്‌നര്‍ തിരുകിയ ശേഷം ലഹരിനുകരുന്നവരുമുണ്ടെന്ന് കുട്ടികള്‍ തന്നെ പറയുന്നു. പൊലിസും സ്‌കൂള്‍ അധികൃതരും സംയോജിതമായി ഫലപ്രദമായ നടപടി എത്രയും പെട്ടെന്ന് എടുക്കണമെന്നാണ് രക്ഷിതാക്കളുടെ ആവശ്യം. ചിലര്‍ കുട്ടികളെ മറ്റു സ്‌കൂളുകളിലേക്ക് മാറ്റാനൊരുങ്ങുകയാണ്.