ബത്തേരി: സുല്‍ത്താന്‍ ബത്തേരിയില്‍ രണ്ടാം ക്ലാസുകാരന് പാമ്പുകടിയേറ്റു. ബീനാച്ചി ഗവ. എച്ച്.എസ്.എസിലെ രണ്ടാം ക്ലാസ് വിദ്യാര്‍ഥിക്കാണ് സ്‌കൂള്‍ പരിസരത്തുനിന്നും പാമ്പുകടിയേറ്റത്. സ്‌കൂളില്‍ നിന്നും വീട്ടിലെത്തിയ വിദ്യാര്‍ഥിക്ക് ക്ഷീണം അനുഭവപ്പെടുന്നതായി തോന്നിയതിനെ തുടര്‍ന്ന് രക്ഷിതാക്കള്‍ അന്വേഷിച്ചപ്പോഴാണ് തന്നെ പാമ്പുകടിച്ചതായി കുട്ടി പറഞ്ഞത്.

തുടര്‍ന്ന് രക്ഷിതാക്കള്‍ കുട്ടിയെ ബത്തേരി താലൂക്ക് ആശുപത്രിയിലും പിന്നീട് മേപ്പാടിയിലെ സ്വകാര്യ ആശുപത്രിയിലും പ്രവേശിപ്പിച്ചു. ഏഴുവയസ്സുകാരനായ വിദ്യാര്‍ഥിക്ക് ആന്റിവെനം നല്‍കാന്‍ തുടങ്ങിയതായും കൃത്യസമയത്ത് ചികിത്സ ആരംഭിച്ചതിനാല്‍ ആരോഗ്യനില തൃപ്തികരമാണെന്നും ഡോക്ടര്‍മാര്‍ പറഞ്ഞു. കാലിന്റെ വിരലിനാണ് കടിയേറ്റത്.

പാമ്പുകടിച്ച വിവരം കുട്ടി അധ്യാപകരോടോ അതേ സ്‌കൂളില്‍ പഠിക്കുന്ന സഹോദരിയോടോ പറഞ്ഞിരുന്നില്ല. വീട്ടില്‍ എത്തി വേദനയും ക്ഷീണവും അനുഭവപ്പെട്ടതോടെയാണ് തന്നെ പാമ്പുകടിച്ചതായി രക്ഷിതാക്കളെ അറിയിച്ചത്. സ്‌കൂള്‍ മുറ്റത്ത് പാകിയ ടൈലിനുള്ളില്‍ പാമ്പിനെ കണ്ടതായും കുട്ടി അറിയിച്ചിട്ടുണ്ട്.