ശാസ്താംകോട്ട: സ്വകാര്യ ആശുപത്രിയില്‍ നവജാതശിശു മരിച്ചത് ചികിത്സാ പിഴവ്  മൂലമെന്ന്  ബന്ധുക്കളുടെ പരാതി. കുന്നത്തൂര്‍ മാനാംപുഴ ചരുവിള വടക്കതില്‍ രതീഷ് ഷീബ ദമ്പതികളുടെ കുഞ്ഞാണ് കഴിഞ്ഞ ദിവസം മരിച്ചത്.
ഷീബ ഗര്‍ഭധാരണം മുതല്‍ ഭരണക്കാവില്‍ സമീപമുള്ള സ്വകാര്യ ആശുപത്രിയില്‍  ചികിത്സയിലായിരുന്നു. ഈ മാസം ആറിനും പന്ത്രണ്ടിനുമിടയില്‍ പ്രസവം നടക്കുമെന്നായിരുന്നു ഡോക്ടര്‍ പറഞ്ഞിരുന്നത്. അതനുസരിച്ച് ആറിന് തന്നെ ഷീബ ആശുപത്രിയിലെത്തി. എന്നാല്‍ ചികിത്സിച്ചുകൊണ്ടിരുന്ന ഗൈനക്കോളജി ഡോക്ടര്‍ മാറി. പുതിയ ഡോക്ടര്‍ വന്നിരുന്നു. ഇവര്‍ ഷീബയെ പരിശോധിക്കുകയും 21ന് വന്നാല്‍ മതിയെന്നു പറഞ്ഞ് മടക്കി അയച്ചു. വീട്ടിലെത്തിയ ഷീബക്കു പുലര്‍ച്ചെ തന്നെ വേദനയുണ്ടാവുകയും   ഹോസ്പിറ്റലിലേക്ക് തിരികെ എത്തുകയും ചെയ്തു. രാവിലെ നഴ്‌സുമാര്‍ ഡ്യൂട്ടി കഴിഞ്ഞ തിരകെ പോകാനുള്ള തിരക്കിലായതിനാല്‍ ഇവരെ ആശുപത്രി അധികൃതര്‍ ശ്രദ്ധിച്ചില്ല. താമസിച്ച് എത്തിയ ഡോക്ടര്‍ സിസേറിയനിലൂടെ കുട്ടിയെ പുറത്തെടുത്തെങ്കിലും ശ്വാസമുട്ടല്‍ അനുഭവപ്പെട്ട് കുഞ്ഞിന്റെ നില വഷളായതിനാല്‍ അടൂരിലെ സ്വകാര്യ ആശുപത്രിയിലേക്ക്  കൊണ്ടുപോയി. ഇവിടെ വച്ചാണ് കുട്ടി മരിച്ചത്. കുട്ടിയുടെ മൃതദേഹവുമായി ബന്ധുക്കള്‍ തിരികെ ആശുപത്രിയില്‍ ബഹളും വെക്കുകയും പൊലിസില്‍ പരാതി നല്‍കുകയും ചെയ്തു. ഇതിനെ തുടര്‍ന്ന് പൊലിസ് ഇന്‍ക്വസ്റ്റ് നടത്തി മൃതദേഹം മെഡിക്കല്‍ കോളജില്‍ പോസ്റ്റ് മോര്‍ട്ടത്തിനായി അയച്ചു.