ശാസ്താംകോട്ട: ആളൊഴിഞ്ഞ കസേരകളുമായി താലൂക്ക് വികസന സമിതി യോഗം. ഇന്നലെ നടന്ന താലൂക്ക് വികസന സമിതിക്കാണ് ഈ ദുരവസ്ഥ. ജനപ്രതിനിധികളോ രാഷ്ട്രീയ പാര്‍ട്ടി പ്രതിനിധികളുടെയോ പൂര്‍ണ്ണ പങ്കാളിത്തം യോഗത്തിലുണ്ടായില്ല.
പ്രധാനപ്പെട്ട തീരുമാനങ്ങളെടുക്കുന്ന താലൂക്ക് വികസന സമിതി യോഗമാണ് ഇത്തരത്തില്‍ പ്രഹസനമായി മാറിയത്. താലൂക്കിലെ പഞ്ചായത്ത് പ്രസിഡന്റുമാരും, എം.എല്‍.എ, രാഷ്ട്രീയ പാര്‍ട്ടി പ്രതിനിധികള്‍, വിവിധ വകുപ്പ് മേധാവികള്‍, തഹസില്‍ദാര്‍, ഉദ്യോഗസ്ഥര്‍ എന്നിവരുടെ നേതൃത്വത്തില്‍ എല്ലാമാസവും ആദ്യത്തെ ശനിയാഴ്ചയാണ് താലൂക്ക് വികസന സമിതി യോഗം ചേരുന്നത്.
ഇത്തവണ ശനിയാഴ്ച സ്ഥലം എം.എല്‍.എ അടക്കം അസൗകര്യം അറിയിച്ചതിനാലാണ്  ഇന്നലെ വികസന സമിതി വിളിച്ചുചേര്‍ത്തത്. ആകെ പങ്കെടുത്തത് ബ്ലോക്ക് പഞ്ചായത്ത് പ്രസിഡന്റ എ സുമയും ചുരുക്കം ചില ജന പ്രതിനിധികളും മാത്രമാണ്. തഹസില്‍ദാരുടെ നേതൃത്വത്തില്‍ ഉദ്യോഗസ്ഥര്‍ യോഗത്തിന് എത്തിയിരുന്നു. പങ്കാളിത്തം കുറവായതിനാല്‍  യോഗം പെട്ടെന്ന് അവസാനിപ്പിച്ചു.