സാറ മുഹമ്മദ്

നെടുമങ്ങാട്: നാട്ടുകാരുടെ സൈ്വര്യ ജീവിതത്തിനു ഭീഷണിയായി ഭിക്ഷാടന മാഫിയ. മലയോര താലൂക്കിലെ വിവിധ മേഖലകളില്‍ ഭിക്ഷാടന മാഫിയ സജീവമാണ്. കഴിഞ്ഞ കുറച്ചു നാളായി ഇത്തരക്കാരുടെ ശല്യം കുറവായിരുന്നു. പക്ഷെ മണ്ഡല കാലമായതോടെ ഭിക്ഷാടന മാഫിയ സജീവമാകുകയായിരുന്നു.
കേരളത്തിന് പുറമെ തമിഴ്‌നാട്, ആന്ധ്രാ സ്വദേശികളാണ് സജീവം. താലൂക്കിലെ ബസ് സ്റ്റാന്‍ഡുകള്‍, മാര്‍ക്കറ്റ്, ആരാധനാലയങ്ങള്‍ തുടങ്ങിയ സ്ഥലങ്ങളിലാണ് ഇവര്‍ തമ്പടിക്കുന്നതു. പ്രായമായ സ്ത്രീകള്‍, പുരുഷന്മാര്‍, കുട്ടികള്‍ എന്നിങ്ങനെ ഉള്ളവരാണ് സംഘത്തില്‍ ഉള്‍പ്പെടുന്നത്. വീടുകളില്‍ ഭിക്ഷാടനത്തിന് എത്തുന്നവര്‍ ആന്ധ്രാ പ്രദേശിലെ ചിറ്റൂര്‍ മേഖലയില്‍ നിന്നുമുള്ള ഓര്‍ഫനേജുകളില്‍ നിന്നുള്ള സര്‍ട്ടിഫിക്കറ്റുകളുമായാണ് എത്തുന്നത്. ഇതിലുള്ള നമ്പറില്‍ ബന്ധപ്പെട്ടപ്പോള്‍ വ്യാജ സര്‍ട്ടിഫിക്കറ്റു ആണിതെന്നു തെളിഞ്ഞിട്ടുണ്ട്. ബസ് സ്റ്റാന്‍ഡുകള്‍ കവലകള്‍ മാര്‍ക്കറ്റുകള്‍ കേന്ദ്രീകരിച്ചു ഭിക്ഷാടനം നടത്തുന്നവര്‍ക്ക് ചെറിയ തുക നല്‍കിയാല്‍ അധിക്ഷേപവും അസഭ്യം ഉറപ്പ്. രണ്ടു ദിവസം മുന്‍പ് മലയോര മേഖലയിലെ ഒരു കെ.എസ്.ആര്‍.ടി.സി ബസ് സ്റ്റാന്റില്‍ ഇത്തരത്തില്‍ ഭിക്ഷാടനം നടത്തിയ മധ്യ വയസ്‌കന് കൊടുത്ത തുക കുറഞ്ഞു എന്നത് കാരണം മറ്റു യാത്രക്കാരുടെ മുന്നില്‍ വച്ചു അധിക്ഷേപിച്ചിരുന്നു.
മറ്റു യാത്രക്കാര്‍ ഇടപെട്ടതോടെ ഇയാള്‍ രക്ഷപെടുകയായിരുന്നു. ഈ അവസ്ഥ തന്നെയാണ് മറ്റു പ്രദേശങ്ങളിലും.ഭിക്ഷടന മാഫിയക്കാര്‍ പണം പിടിച്ചു പറിക്കുന്ന തരത്തിലേക്ക് എത്തിയ ദുരവസ്ഥയാണ് നിലവില്‍. ഇത്തരത്തില്‍ നൂറു കണക്കിന് ആളുകളാണ് താലൂക്കില്‍ വിവിധ ഭാഗങ്ങളില്‍ ഭിക്ഷ എടുക്കുന്നത്. ദിവസേന നല്ലൊരു തുക ഇവര്‍ പിരിച്ചെടുക്കുന്നുണ്ട്. ചില ആഘോഷ സമയങ്ങളില്‍ മറ്റു മേഖലകളില്‍ നിന്നും വാഹനങ്ങളില്‍ ഭിക്ഷാടനത്തിനു ആളുകളെ ഇവിടെ എത്തിക്കുന്നുമുണ്ട്. സ്‌കൂള്‍ കുട്ടികള്‍ക്ക് നേരെ അതിക്രമങ്ങളും ഇവരുടെ ഭാഗത്തു നിന്നും നിരവധി തവണ ഉണ്ടായിട്ടുള്ളതായി പരാതികള്‍ ഉണ്ട്.ഭിക്ഷാടന മാഫിയയില്‍ പെട്ട ചിലര്‍ കഞ്ചാവ് വില്‍പ്പനയിലും സജീവമാണെന്നാണ് അറിയുന്നത്. നേരത്തെ മാര്‍ക്കറ്റ് ജങ്ഷനില്‍ ഭിക്ഷാടനത്തിന് ഒപ്പം കഞ്ചാവും വില്‍പ്പന നടത്തിയിരുന്ന മധ്യ വയസ്‌ക്കയെ പൊലിസ് പിടികൂടിയിരുന്നു. ഭിക്ഷാടന മാഫിയയെ നിയന്ത്രിക്കാന്‍ നിയമപാലകര്‍ തയാറാകാത്തത് ഇവര്‍ക്ക് അനുഗ്രഹമാണ്. നിയമ പാലകര്‍ അടിയന്തിരമായി നടപടികള്‍ സ്വീകരിച്ചില്ലെങ്കില്‍ നെടുമങ്ങാട് ഭിക്ഷാടന മാഫിയയുടെ താവളമായി മാറും.