ഉരുവച്ചാല്‍: സ്വകാര്യ ബസുകളുടെ സൂചനാ പണിമുടക്കില്‍ യാത്രക്കാര്‍ വലഞ്ഞപ്പോള്‍ പൊലിസ് ബസുകളുടെ സര്‍വിസ് യാത്രക്കാര്‍ക്ക് ആശ്വാസമായി. മട്ടന്നൂര്‍-കണ്ണൂര്‍-ഇരിട്ടി-തലശേരി റൂട്ടില്‍ സ്വകാര്യ ബസുകള്‍ പണിമുടക്കിയതോടെയാണ് മട്ടന്നൂര്‍ പൊലിസിന്റെ നേതൃത്വത്തില്‍ പണിമുടക്കുന്ന ഭാഗങ്ങളില്‍ പൊലിസ് ബസില്‍ യാത്രക്കാരെ കയറ്റിയത്. ആശുപത്രിയില്‍ പോകുന്നവര്‍ക്ക് ആശുപത്രിയുടെ മുന്നില്‍ നിര്‍ത്തികൊടുത്തും വിദ്യാര്‍ഥികളെ സ്‌കൂളിനു മുന്നില്‍ ഇറക്കിയും വാഹനം യാത്രതുടര്‍ന്നു. എല്ലാ സ്റ്റോപ്പുകളിലും നിര്‍ത്തി യാത്രക്കാരെ വിളിച്ചു കയറ്റുമ്പോള്‍ യാത്രക്കാരായ സ്തീകള്‍ ആദ്യം പൊലിസ് ബസില്‍ കയറാന്‍ ഭയപ്പെട്ടെങ്കിലും കാര്യം മനസിലായപ്പോള്‍ ബസില്‍ സൗജന്യമായി യാത്ര ചെയ്തു. എ.എസ്.ഐ അബൂബക്കറാണ് യാത്ര നിയന്ത്രിച്ചത്. മട്ടന്നൂര്‍ എസ്.ഐ കെ.വി ദിനേശിന്റ നേതൃത്വത്തിലാണ് മട്ടന്നൂര്‍ ഇരിട്ടി, ഉരുവച്ചാല്‍, കൂത്തുപറമ്പ്, മട്ടന്നൂര്‍ ചാലോട് റൂട്ടുകളില്‍ സൗജന്യ സര്‍വിസ് നടത്തിയത്. രണ്ടു പൊലിസ് ബസുകളാണ് സര്‍വിസ് നടത്താനെത്തിച്ചത്. പൊലിസ് ബസും ആവശ്യത്തിന് കെ.എസ്.ആര്‍.ടി.സിയും ടാക്‌സികളും സര്‍വിസ് നടത്തിയതിനാല്‍ ജനങ്ങള്‍ക്കും വിദ്യാര്‍ഥികള്‍ക്കും ആശ്വാസമായി. സ്റ്റോപ്പുകളില്‍ നിര്‍ത്താതെ പോകുന്ന ബസുകള്‍ക്കെതിരേ കര്‍ശന നടപടി സ്വീകരിക്കുമെന്ന് മട്ടന്നൂര്‍ എസ്.ഐ എ.വി ദിനേശ് അറിയിച്ചു.