തിരുവനന്തപുരം: പൗരത്വ നിയമ ഭേദഗതിക്കെതിരെ പ്രതിഷേധിച്ച ജാമിഅ മില്ലിയയിലെ വിദ്യാര്‍ഥികള്‍ക്കെതിരെ പൊലിസ് നടത്തിയത് നരനായാട്ടാണെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍.
ജനാധിപത്യ സംവിധാനത്തില്‍ സര്‍ക്കാരുകളുടെ തെറ്റായ നടപടി ചോദ്യം ചെയ്യാനും പ്രതിഷേധിക്കാനും എല്ലാവര്‍ക്കും അവകാശമുണ്ട്. എന്നാല്‍ പ്രതിഷേധിക്കുന്നവരെ വെടിവച്ച് കൊല്ലുന്ന സമീപനമാണ് നരേന്ദ്ര മോദിയുടേത്. വിദ്യാര്‍ഥി സമരത്തെ അക്രമാസക്തമാക്കിയത് പൊലിസാണ്.
ശത്രുസൈന്യത്തെ നേരിടുന്നതു പോലെയാണ് വിദ്യാര്‍ഥികളെ കൈകാര്യം ചെയ്യുന്നത്. ന്യൂനപക്ഷവിഭാഗങ്ങളെ അടിച്ചൊതുക്കുകയെന്ന ലക്ഷ്യം വച്ചാണ് കേന്ദ്രസര്‍ക്കാരിന്റെ നടപടി.ന്യൂനപക്ഷങ്ങള്‍ക്കിടയില്‍ അന്യതാബോധം ശക്തിപ്പെട്ടു. ഇതു സാമുദായിക വിടവ് വര്‍ധിപ്പിക്കാനിടയാക്കും. വിവേചനത്തിന്റേയും അസഹിഷ്ണുതയുടേയും രാഷ്ട്രീയത്തെ എന്തുവിലകൊടുത്തും കോണ്‍ഗ്രസ് പരാജയപ്പെടുത്തുമെന്നും മുല്ലപ്പള്ളി പറഞ്ഞു.