തിരുവനന്തപുരം: എല്ലാ പ്രൈമറി സ്‌കൂളുകളിലും തസ്തിക സൃഷ്ടിച്ച് കലാ-കായിക-പ്രവൃത്തി പരിചയ അധ്യാപകരെ നിയമിക്കുക, ഹൈസ്‌കൂള്‍, ഹയര്‍ സെക്കന്‍ഡറി ഉള്‍പ്പെടെ മുഴുവന്‍ വിദ്യാലയങ്ങളിലും കലാ-കായിക-പ്രവൃത്തി പരിചയ അധ്യാപകരെ നിയമിക്കുക തുടങ്ങിയ ആവശ്യങ്ങള്‍ ഉന്നയിച്ച് സ്‌പെഷലിസ്റ്റ് അധ്യാപകര്‍ കേരള സ്‌കൂള്‍ ടീച്ചേഴ്‌സ് അസോസിയേഷന്റെ നേതൃത്വത്തില്‍ സെക്രട്ടേറിയറ്റ് ധര്‍ണ നടത്തി. ജനറല്‍ സെക്രട്ടറി കെ.സി ഹരികൃഷ്ണന്‍ ഉദ്ഘാടനം ചെയ്തു. സ്‌പെഷലിസ്റ്റ് അധ്യാപകരെ അധ്യാപകര്‍ എന്നറിയപ്പെടാനുള്ള കെ.ഇ.ആര്‍ ഭേദഗതി ഉടന്‍ നടപ്പിലാക്കണമെന്നു സമരക്കാര്‍ ആവശ്യപ്പെട്ടു. നേതാക്കളായ ടി.വി മദന മോഹനന്‍, കെ.ജെ ഹരികുമാര്‍, ബി.സുരേഷ്, എം.ടി ശിവരാജന്‍ പ്രസംഗിച്ചു.