അരൂര്‍: പ്ലാസ്റ്റിക്ക് മാലിന്യം അടിഞ്ഞുകൂടുന്നത് ദുരന്താവസ്ഥ വര്‍ധിപ്പിക്കുന്നു. അധികൃതര്‍ കണ്ടില്ലെന്ന് നടിക്കുന്നു. മാലിന്യ നിര്‍മാര്‍ജനത്തിനായി അരൂരില്‍ ഹരിത കേരളം പദ്ധതി പഞ്ചായത്ത് നടപ്പിലാക്കിയെങ്കിലും പ്രാവര്‍ത്തികമായിട്ടില്ല. ഇതിന്റെ ബോധവല്‍ക്കരണം ഇപ്പോഴും പൂര്‍ണ്ണമായും ജനങ്ങളില്‍ എത്തിക്കാന്‍ കഴിയാത്തതാണ് കാരണം. കടകളില്‍ കൊച്ചു കുട്ടികള്‍ക്കുള്ള ഭക്ഷ്യവസ്തുക്കള്‍ പോലും പ്ലാസ്റ്റിക്ക് കവറിലാണ് കൊടുത്തുവിടുന്നത്. വീടുകളിലും മറ്റും വരുന്ന പ്ലാസ്‌ററിക്കുകള്‍ രാത്രി ഇരുട്ടിന്റെ മറവില്‍ മറ്റാരും കാണാതെ എവിടെയെങ്കിലും തള്ളി സുരക്ഷിതരാവുകയാണ് ചെയ്യുന്നത്. അരൂര്‍ പഞ്ചായത്ത് പ്ലാസ്റ്റിക്ക് മാലിന്യം നിര്‍മ്മാജനം ചെയ്യാന്‍ ജീവനക്കാരെയും ആവശ്യമായ വാഹനങ്ങളും നല്‍കി ഹരിത കേരളം പദ്ധതിയുടെ പ്രവര്‍ത്തനം നടത്തിയെങ്കിലും പരാജയപ്പെട്ടു. അതിരാവിലെ വീട്ടമ്മമാര്‍ തീ പിടിപ്പിക്കുവാന്‍ പ്ലാസ്റ്റിക്ക് ഉപയോഗിക്കാറുണ്ട്. ഇത് മാരകമായ രോഗങ്ങള്‍ക്ക് ഇടവരുത്താറുണ്ട്. തിരക്കേറിയ റോഡില്‍ വാഹനയാത്രക്കാര്‍ കുടിവെള്ള പ്ലാസ്റ്റിക്ക് കുപ്പികള്‍ വലിച്ചെറിയുന്നത് നിത്യ കാഴ്ച്ചയാണ്. വഴിയോരങ്ങളില്‍ വലിച്ചെറിയുന്ന ഭക്ഷണ പാദാര്‍ഥങ്ങളടങ്ങിയ പ്ലാസ്റ്റിക്ക് കിറ്റുകള്‍ തെരുവ് നായ്ക്കള്‍ കടിച്ച കീറി കൊണ്ടു നടക്കുന്നതിനാല്‍ പ്രദേശമാകെ ദുര്‍ഗന്ധവും പകര്‍ച്ചവ്യാധിയും മൂലം ദുരന്തത്തിന് കാരണമായേക്കാം.
അന്യസംസ്ഥാന തൊഴിലാളികള്‍ പ്ലാസ്റ്റിക്ക് കുപ്പികള്‍ ശേഖരിക്കുന്നത് ഒരു പരിധിവരെ അനുഗ്രഹമാണ്. നാം ഓരോരുത്തരും സ്വയം ബോധ്യപ്പെട്ട് മാലിന്യ നിര്‍മ്മാമാര്‍ജ്ജനം ചെയ്തില്ലങ്കില്‍ പ്ലാസ്റ്റിക്ക് മൂലം ഒരു വന്‍ ദുരന്തത്തെ നേരിടേണ്ടിവരും