സ്വന്തം ലേഖകന്‍
തിരുവനന്തപുരം: പൗരത്വനിയമ വിഷയത്തില്‍ സര്‍ക്കാരുമായി ചേര്‍ന്ന് യു.ഡി.എഫ് സമരം നടത്തിയതിനെതിരെയുള്ള അതൃപ്തി തുറന്നടിച്ച് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനും രംഗത്തെത്തി. പ്രതിപക്ഷ നേതാവ് രമേശ് ചെന്നിത്തലയുടെ നേതൃത്വത്തില്‍ യു.ഡി.എഫ് തലത്തില്‍ കൂടിയാലോചനകള്‍ നടത്താതെ സര്‍ക്കാരുമായി ചേര്‍ന്ന് തിരുവനന്തപുരത്ത് പ്രതിഷേധ പരിപാടി സംഘടിപ്പിച്ചതിനെ തള്ളിക്കൊണ്ടു യു.ഡി.എഫ് കണ്‍വീനര്‍ ബെന്നി ബെഹ്‌നാന്‍ രംഗത്തുവന്നതിനു പിന്നാലെയാണ് സമരം പ്രഹസനമായിരുന്നുവെന്ന് പറഞ്ഞുകൊണ്ട് മുല്ലപ്പള്ളി മാധ്യമങ്ങള്‍ക്കു മുന്നിലെത്തിയത്.
ഇടതുപക്ഷവുമായി ചേര്‍ന്ന് ഒരു സമരത്തിനും കോണ്‍ഗ്രസ് തയാറല്ലെന്ന് മുല്ലപ്പള്ളി രാമചന്ദ്രന്‍ പറഞ്ഞു. ദേശീയതലത്തില്‍ ഫാസിസ്റ്റ് ശക്തികളെ ശക്തമായി പ്രതിരോധിക്കുന്ന പ്രസ്ഥാനം കോണ്‍ഗ്രസ് മാത്രമാണ്. ഫാസിസ്റ്റ് ശക്തികള്‍ക്കെതിരെ കോണ്‍ഗ്രസ് നടത്തിയ പോരാട്ടങ്ങളില്‍നിന്ന് കേരളത്തിലെ സി.പി.എം നാളിതുവരെ ഒളിച്ചോടുകയായിരുന്നു. രാഹുല്‍ ഗാന്ധിയുടെ നേതൃത്വത്തില്‍ ഫാസിസ്റ്റ് വിരുദ്ധ പോരാട്ടത്തിനായി ജനാധിപത്യ മതേതരചേരിയുണ്ടാക്കാന്‍ കഴിഞ്ഞ ലോക്‌സഭാ തെരഞ്ഞെടുപ്പുകാലത്ത് ശ്രമിച്ചപ്പോള്‍ അതിനെ അട്ടിമറിച്ചത് സി.പി.എം കേരളഘടകത്തിലെ നേതാക്കളാണ്.
മുഖ്യമന്ത്രിയുടെ നേതൃത്വത്തില്‍ കേരളത്തിലെ കേന്ദ്രനേതാക്കളാണ് ദേശീയ അടിസ്ഥാനത്തിലുള്ള മതേതര ജനാധിപത്യ വേദി തകര്‍ത്തത്. സി.പി.എമ്മിന്റെ ന്യൂനപക്ഷ പ്രേമം കാപട്യവും ആത്മാര്‍ഥതയില്ലാത്തതുമാണ്. ന്യൂനപക്ഷ വോട്ടില്‍കണ്ണുവച്ചുള്ള ഒരു പ്രഹസനം മാത്രമായിരുന്നു. അതുകൊണ്ടുതന്നെ അടഞ്ഞ അധ്യായവുമാണ്.
ബീഫ് നിരോധനവുമായി ബന്ധപ്പെട്ട് ബീഫ് മേളകള്‍ നടത്തിയപ്പോള്‍ ന്യൂനപക്ഷവിഭാഗങ്ങള്‍ ഇവരുടെ കള്ളക്കളി തിരിച്ചറിഞ്ഞിട്ടുണ്ട്. യു.എ.പി.എ കരിനിയമമാണെന്ന് രാജ്യസഭയില്‍ ഘോരഘോരം പ്രസംഗിച്ച നേതാവാണ് സീതാറാം യെച്ചൂരി. ആ കരിനിയമം ഉപയോഗിച്ച് നിയമവിരുദ്ധമായി രണ്ട് മുസ്‌ലിം യുവാക്കളെ തടങ്കലില്‍ പാര്‍പ്പിച്ചിരിക്കുന്നത് എന്തിനാണ്.
അവര്‍ ചെയ്ത കുറ്റം എന്താണെന്ന് സര്‍ക്കാരും സി.പി.എമ്മും ഇതുവരെ വിശദീകരിച്ചിട്ടില്ല. ആര്‍.എസ്.എസിനോടും ബി.ജെ.പിയോടും മൃദുഹിന്ദുത്വ സമീപനമാണ് മുഖ്യമന്ത്രി സ്വീകരിക്കുന്നത്. ഉത്തരമലബാറില്‍ സി.പി.എം നടത്തിയ രാഷ്ട്രീയ കൊലപാതകങ്ങളിലെ ഇര ഏറിയകൂറും മുസ്‌ലിം വിഭാഗത്തിലെ യുവാക്കളാണ്. ന്യൂനപക്ഷത്തെ ഉപയോഗിച്ച് നടത്തുന്ന ഈ വോട്ടുബാങ്ക് രാഷ്ട്രീയം ഇനി കേരളത്തില്‍ വിലപ്പോകില്ലെന്നും മുല്ലപ്പള്ളി ചൂണ്ടിക്കാട്ടി.
സമരത്തില്‍ മുല്ലപ്പള്ളി പങ്കെടുത്തിരുന്നില്ല. സര്‍ക്കാരിനൊപ്പം സമരത്തിന് ചേര്‍ന്ന നടപടിയെ യു.ഡി.എഫിലെ ഘടകകക്ഷികളും അതൃപ്തി അറിയിച്ചിരുന്നു. തനിച്ചു സമരം നടത്താന്‍ കഴിവുള്ളപ്പോള്‍ സര്‍ക്കാര്‍ ചെലവില്‍ സമരം വേണ്ടെന്നായിരുന്നു കോണ്‍ഗ്രസില്‍ ഒരു വിഭാഗത്തിന്റെ നിലപാട്.