അന്തിക്കാട്: അരിമ്പൂര്‍ ഹൈസ്‌കൂളിനു മുന്നില്‍ വില്‍പനക്കെത്തിച്ച 100 ഗ്രാം ലഹരിമരുന്നുമായി (ചരസ്) രണ്ടു പേര്‍ പിടിയില്‍. അരിമ്പൂര്‍ സ്വദേശി കല്ലയില്‍ വീട്ടല്‍ നിഖില്‍ (25), അരണാട്ടുകര സ്വദേശി മണപ്പെട്ടി വീട്ടില്‍ രാഹുല്‍ (20) എന്നിവരെയാണ് അന്തിക്കാട് പൊലിസ് അറസ്റ്റു ചെയ്തത്.
വിദ്യാര്‍ഥികള്‍ക്കു വില്‍പന നടത്തുക എന്ന ഉദ്ദേശത്തോടെയാണ് ഇവര്‍ ഇവിടെ തമ്പടിച്ചത്. ചെറിയ പൊതികളാക്കി ആവശ്യാനുസരണം കൈമാറാവുന്ന രീതിയിലാണ് ചരസ് ഒളിപ്പിച്ചു വെച്ചിരുന്നത്. ഇവരുടെ കൂട്ടാളികളെയാണ് തൃശൂര്‍ ടൗണില്‍ കുറച്ചു നാള്‍ മുന്‍പ് ഷാഡോ പൊലിസ് പിടികൂടിയിരുന്നത്.
അവരുടെ കണ്ണികളാണിവരെന്നും പൊലിസ് പറഞ്ഞു. ഹരിദ്വാറില്‍ നിന്നാണ് ഇവ വിതരണത്തിനായി എത്തിക്കുന്നതെന്നാണ് പ്രതികള്‍ പൊലിസിനു മൊഴി നല്‍കിയത്.
ജില്ലാ പൊലിസ് മേധാവിക്കു കിട്ടിയ രഹസ്യവിവരത്തിന്റെ അടിസ്ഥാനത്തില്‍ ഇരിങ്ങാലക്കുട ഡിവൈ.എസ്.പി ഫേമസ് വര്‍ഗീസിന്റെ നിര്‍ദേശപ്രകാരം അന്തിക്കാട് എസ്.ഐ കെ.എസ് സൂരജാണ് പ്രതികളെ പിടികൂടിയത്. എ.എസ്.ഐ വില്‍സന്‍ ചെറിയാന്‍, ഫൈസല്‍, ഭുവനേശ്വരന്‍, അജിത് എന്നിവരും പ്രതികളെ പിടികൂടിയ സംഘത്തില്‍ ഉണ്ടായിരുന്നു.