ബംഗളൂരു: ഉയര്‍ന്ന രക്തസമ്മര്‍ദത്തെയും കഠിനമായ ഛര്‍ദിയെയും തുടര്‍ന്ന് ബംഗളൂരുവിലെ ആശുപത്രിയില്‍ പ്രവേശിപ്പിക്കപ്പെട്ട പി.ഡി.പി ചെയര്‍മാന്‍ അബ്ദുന്നാസിര്‍ മഅ്ദനിയെ രണ്ടാഴ്ചത്തെ പരിപൂര്‍ണ വിശ്രമവും തുടര്‍ചികിത്സകളും നിര്‍ദേശിച്ച് ഇന്നലെ ഉച്ചയോടെ ഡിസ്ചാര്‍ജ് ചെയ്തു.
ആശുപത്രിയില്‍ പ്രവേശിപ്പിക്കപ്പെട്ട മഅ്ദനിക്ക് ഡോക്ടര്‍മാരുടെ നിര്‍ദേശപ്രകാരം എം.ആര്‍.ഐ സ്‌കാന്‍, വിവിധ അവയവങ്ങളുടെ സി.ടി സ്‌കാന്‍, ഹൃദയസംബന്ധമായ പരിശോധനകള്‍ തുടങ്ങിയവ നടത്തിയിരുന്നു. 30 വര്‍ഷത്തോളമായി അനിയന്ത്രിതമായി തുടരുന്ന രക്തത്തിലെ പഞ്ചസാരയുടെ അളവ് ശരീരത്തിലെ പല അവയവങ്ങളുടെയും പ്രവര്‍ത്തനത്തെ സാരമായി ബാധിച്ചിട്ടുണ്ടെന്ന് പരിശോധനയില്‍ കണ്ടെത്തിയിരുന്നു.
ഇടയ്ക്കിടെ ക്രമാതീതമായി ഉയരുന്ന രക്തസമ്മര്‍ദം മൂലം അവയവങ്ങള്‍ക്ക് തകരാര്‍ സംഭവിക്കാന്‍ സാധ്യതയുള്ളതിനാല്‍ വിശ്രമവും നിരന്തരമായി കോടതിയില്‍ ഹാജരാകുന്നതില്‍ നിന്ന് ഒഴിവാകണമെന്നും നിര്‍ദേശിച്ചിട്ടുണ്ട്. വൃക്കകള്‍ക്ക് വീക്കവും കല്ലുകളും പരിശോധനയില്‍ കണ്ടെത്തി.
ഡയബറ്റിക് ന്യൂറോപതി മൂലം ശരീരത്തിലെ ഞെരമ്പുകളുടെ പ്രവര്‍ത്തനശേഷിയില്‍ കാര്യമായ തകരാര്‍ സംഭവിച്ചതിനാല്‍ സ്പര്‍ശന ശേഷിയില്‍ കുറവുണ്ടായിട്ടുണ്ട്. മരുന്നുകള്‍ ഉപയോഗിച്ചുള്ള ചികിത്സകളുടെ സാധ്യത അവസാനിച്ചതിനാല്‍ ഉടന്‍ സര്‍ജറി നടത്തുമെന്നും ഡോക്ടര്‍മാര്‍ നിര്‍ദേശിച്ചു. ഇവ കൂടാതെ പെപ്റ്റിക് അള്‍സര്‍, ഡയബറ്റിക് റെറ്റിനോപതി, വൃക്ക സംബന്ധമായ മറ്റ് അസുഖങ്ങള്‍, യൂറിക് ആസിഡ്, ഡിസ്‌ക് പ്രൊലാപ്‌സ് തുടങ്ങിയ അസുഖങ്ങള്‍ നിലവില്‍ മഅ്ദനിയെ അലട്ടുന്നുണ്ട്. ഹൃദയസംബന്ധമായ അസുഖങ്ങള്‍ക്കുള്ള ചികിത്സകള്‍ തുടരാനും പരിശോധനയില്‍ കണ്ടെത്തിയ മറ്റ് അസുഖങ്ങള്‍ക്കുള്ള ചികിത്സകള്‍ ക്രമാനുഗതമായി നടത്തണമെന്നും അല്‍ഷിഫാ ഹോസ്പിറ്റലിലെ വിവിധ മെഡിക്കല്‍ ഡിപാര്‍ട്ട്‌മെന്റുകളിലെ ഡോക്ടര്‍മാരുടെ സംഘം നിര്‍ദേശിച്ചു. ബംഗളൂരു സ്‌ഫോടനക്കേസ് വിചാരണ നടക്കുന്ന പ്രത്യേക കോടതിയില്‍ നടപടിക്രമങ്ങളുടെ ഭാഗമായുള്ള വിചാരണയില്‍ പങ്കെടുക്കാന്‍ നിലവിലുള്ള ആരോഗ്യസ്ഥിതി അനുവദിക്കാത്തതിനാല്‍ മെഡിക്കല്‍ ഡിസ്ചര്‍ജ് സമ്മറി ഉള്‍പ്പെടെയുള്ള വിവരങ്ങള്‍ കോടതിയെ ധരിപ്പിച്ച് ഇളവുനേടാന്‍ മഅ്ദനിയുടെ അഭിഭാഷകര്‍ അടുത്ത ദിവസം പ്രത്യേക കോടതിയെ സമീപിക്കും.
ഉച്ചയോടെ ആശുപത്രിയില്‍ നിന്ന് ഡിസ്ചാര്‍ജായ മഅ്ദനി ബംഗളൂരുവിലുള്ള വസതിയിലാണ് ഇപ്പോള്‍ കഴിയുന്നത്. അദ്ദേഹത്തിനൊപ്പം ഭാര്യ സൂഫിയ മഅ്ദനി, അനുജന്‍ സിദ്ധീഖ്, മകന്‍ സലാഹുദീന്‍ അയ്യൂബി, പി.ഡി.പി നേതാവ് മുഹമ്മദ് റജീബ്, സഹായികളായ സിദ്ദീഖ്, ഷാനി എന്നിവരുമുണ്ട്.