കോഴിക്കോട്: ഉത്തരേന്ത്യയിലെ നിയമസഭാ തെരഞ്ഞെടുപ്പുകളില്‍ മികച്ച വിജയം നേടിയ കോണ്‍ഗ്രസ് നേതൃത്വത്തെ മുസ്‌ലിം ലീഗ് അധ്യക്ഷന്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ അഭിനന്ദിച്ചു. ഇതുസംബന്ധിച്ച് രാഹുല്‍ ഗാന്ധിക്ക് അദ്ദേഹം കത്തയച്ചു. രാജസ്ഥാന്‍, മധ്യപ്രദേശ്, ചത്തീസ്ഗഡ് സംസ്ഥാനങ്ങളിലെ കോണ്‍ഗ്രസ് നേതൃത്വത്തെയും പ്രവര്‍ത്തകരെയും തങ്ങള്‍ അഭിനന്ദിച്ചു.
ലോക്‌സഭാ തെരഞ്ഞെടുപ്പില്‍ മിന്നുന്ന വിജയം കാഴ്ചവയ്ക്കാന്‍ കഴിയട്ടെയെന്നും തങ്ങള്‍ ആശംസിച്ചു. ഇതിനായി മുസ്‌ലിം ലീഗിന്റെ എല്ലാ പിന്തുണയും സഹകരണവും ഉണ്ടാകും. രാഹുല്‍ ഗാന്ധിയുടെ നേതൃത്വത്തിലുള്ള കോണ്‍ഗ്രസിന്റെ പ്രവര്‍ത്തനമാണ് വിജയത്തിന് മുഖ്യപങ്കുവഹിച്ചതെന്നും കത്തില്‍ പറയുന്നു.