അനന്തപുര്‍: ഒരു ഇന്നിങ്‌സില്‍ പത്ത് വിക്കറ്റ് നേട്ടം. അനില്‍ കുംബ്ലയുടെ ചരിത്രനേട്ടത്തിന് ഇന്ത്യയില്‍നിന്നു തന്നെയൊരു പിന്‍ഗാമി. അണ്ടര്‍ 19 കൂച്ച്ബിഹാര്‍ ട്രോഫിയിലാണ് മണിപ്പൂരി താരം ചരിത്രത്തിലേക്ക് പന്തെറിഞ്ഞത്. മണിപ്പൂരി താരം റെക്‌സ് രാജ്കുമാര്‍ സിങാണ് ഒരു ഇന്നിങ്‌സില്‍ 10 വിക്കറ്റും വീഴ്ത്തി ഇന്ത്യന്‍ സ്പിന്‍ ഇതിഹാസം അനില്‍ കുംബ്ലയുടെ ചരിത്ര നേട്ടത്തിനൊപ്പമെത്തിയത്. അരുണാചല്‍ പ്രദേശിനെതിരായ പോരാട്ടത്തിലാണ് റെക്‌സിന്റെ ചരിത്ര നേട്ടം. റെക്‌സിന്റെ മാരകപ്രഹരത്തില്‍ അരുണാചല്‍ മണിപ്പൂരിനോട് കീഴടങ്ങുകയും ചെയ്തു.
രണ്ടാം ഇന്നിങ്‌സില്‍ ബാറ്റു ചെയ്ത അരുണാചലിന്റെ 10 വിക്കറ്റും 9.5 ഓവറില്‍ 11 റണ്‍സ് മാത്രം വഴങ്ങിയാണ് റെക്‌സ് സിങ് കറക്കി വീഴ്ത്തിയത്. ആറ് ഓവര്‍ റെക്‌സ് മെയ്ഡന്‍ എറിഞ്ഞു. ഒന്നാം ഇന്നിങ്‌സില്‍ റെക്‌സ് അഞ്ചു വിക്കറ്റ് വീഴ്ത്തിയിരുന്നു.