പാലക്കാട്: ഇന്ത്യയുടെ 70ാം സ്വാതന്ത്ര്യദിനാഘോഷത്തോടനുബന്ധിച്ച് ഈ മാസം 14നു രാവിലെ 10 മണിക്ക് 'നാനാത്വത്തില്‍ ഏകത്വം' നമ്മുടെ ഇന്ത്യ എന്ന വിഷയത്തില്‍ ഒറ്റപ്പാലത്ത് ജില്ലാസെമിനാര്‍ നടത്താന്‍ എസ്.വൈ.എസ് ജില്ലാ സെക്രട്ടേറിയറ്റ് യോഗം തീരുമാനിച്ചു.
നമ്മുടെ മുന്‍ഗാമികളും മുസ്‌ലിംകള്‍ ഉള്‍പ്പടെയുള്ള സ്വാതന്ത്ര്യ സമര സേനാനികളും ത്യാഗം ചെയ്ത് നേടിയെടുത്ത സ്വാതന്ത്ര്യം ഇന്ത്യയുടെ നാനാത്വത്തില്‍ ഏകത്വം സംരക്ഷിക്കാനാണ്. ഇന്ത്യ പിന്തുടര്‍ന്ന സൗഹാര്‍ദപരമായ പാരമ്പര്യത്തെ തകര്‍ത്തെറിയാനുള്ള വര്‍ഗീയ ഫാസിസ്റ്റ് അജണ്ടകളെ തിരിച്ചറിഞ്ഞ് പരാജയപ്പെടുത്തിയില്ലെങ്കില്‍ രാജ്യത്തെ ന്യൂനപക്ഷ-ദലിത് ജനവിഭാഗങ്ങളെ മാത്രമല്ല മുഴുവന്‍ ജനങ്ങളേയും അത് ദോഷകരമായി ബാധിക്കും. പശുസംരക്ഷണത്തിന്റെ പേരിലും മതസ്വാതന്ത്ര്യത്തിന്റെ പേരിലും ന്യൂനപക്ഷ വിഭാഗങ്ങളും ദലിതരും രാജ്യത്ത് ക്രൂരമായി പീഡിപ്പിക്കപ്പെടുകയും, തുല്യതയില്ലാത്ത കൊലപാതകങ്ങള്‍ക്കും ഒറ്റപ്പെടുത്തലുകള്‍ക്കും വിധേയമായിക്കൊണ്ടിരിക്കുന്ന സാഹചര്യത്തില്‍ രാജ്യത്തിന്റ ദേശീയതയും അഖണ്ഡതയും മങ്ങലേല്‍ക്കാതെ കാത്തുസൂക്ഷിക്കാനും ഇന്ത്യയുടെ മതേതരത്വത്തിന്റെ പൈതൃകം സംരക്ഷിക്കാനും പൊതുകൂട്ടായ്മകള്‍ അനിവാര്യമായ സാഹചര്യത്തിലാണ് സെമിനാര്‍ സംഘടിപ്പിക്കുന്നതെന്ന് സെക്രട്ടേറിയറ്റ് വ്യക്തമാക്കി. വിവിധ മത-രാഷ്ട്രീയ-സാമൂഹിക-സാംസ്‌കാരിക നേതാക്കള്‍ സെമിനാറില്‍ പങ്കെടുക്കും.
സംഘടനാപ്രവര്‍ത്തനം സജീവമാക്കുന്നതിന്റെ ഭാഗമായി 'തന്‍ഹീള് 2017' എന്ന പേരില്‍ മണ്ഡലം ക്യാംപുകള്‍ സംഘടിപ്പിക്കാനും സെക്രട്ടേറിയറ്റ് യോഗം തീരുമാനിച്ചു. കൊടക്കാട് മഹല്ലിലെ പൊലിസ് നടപടിയിലും മലപ്പുറം ജില്ലയിലെ മുടിക്കോട് മഹല്ലില്‍ വിഘടിതരുടെ ആക്രമണത്തിലും യോഗം ശക്തമായി പ്രതിഷേധിച്ചു. വൈസ് പ്രസിഡന്റ് ടി.പി അബൂബക്കര്‍ മുസ്‌ലിയാര്‍ യോഗത്തില്‍ അധ്യക്ഷനായി. സയ്യിദ് അബ്ദുറഹിമാന്‍ ജിഫ്‌രി തങ്ങള്‍ പ്രാര്‍ഥനക്ക് നേതൃത്വം നല്‍കി. ജനറല്‍.സെക്രട്ടറി ടി.കെ മുഹമ്മദ്കുട്ടി ഫൈസി കരുവാന്‍പടി സ്വാഗതവും വര്‍ക്കിങ് സെക്രട്ടറി ജി.എം സ്വലാഹുദ്ധീന്‍ ഫൈസി നന്ദിയും പറഞ്ഞു.
ഇ.വി ഖാജാ ദാരിമി തൂത, കെ.പി.എ സമദ് മാസ്റ്റര്‍ പൈലിപ്പുറം, എന്‍. ഹബീബ് ഫൈസി കോട്ടോപ്പാടം, പി.എം. യൂസഫ് പത്തിരിപ്പാല, എ.എ ഖാദര്‍ അന്‍വരി കൈറാടി, എം.ടി സൈനുല്‍ ആബിദീന്‍ മാസ്റ്റര്‍ പനമണ്ണ, ടി. ഇബ്‌റാഹിം കുട്ടി മാസ്റ്റര്‍ കുമ്പിടി, വി.എസ്.എ സിദ്ധീഖ് മുസ്‌ലിയാര്‍, പി. മുഹമ്മദ്കുട്ടി മാസ്റ്റര്‍, എ.എ ജബ്ബാര്‍ ഫൈസി പുത്തിരിപ്പാടം, സയ്യിദ് ഹസന്‍ തങ്ങള്‍ കൊപ്പം, സിദ്ധീഖുല്‍ അക്ബര്‍ ഫൈസി ഇരുമ്പാലശ്ശേരി, അബ്ദുറഹിമാന്‍ കരിമ്പ ചര്‍ച്ചയില്‍ പങ്കെടുത്തു.