ഗ്വാങ്ഷു: ഇന്ത്യന്‍ ഒളിംപിക്‌സ് മെഡല്‍ ജേതാവ് പി.വി സിന്ധുവിന് വേള്‍ഡ് ടൂര്‍ ബാഡ്മിന്റണില്‍ ജയം. ജപ്പാന്റെ മുന്‍ചാംപ്യന്‍ അകനെ യാമാഗുച്ചിയെയാണ് നേരിട്ടുള്ള സെറ്റുകള്‍ക്ക് സിന്ധു പരാജയപ്പെടുത്തിയത്. 24-22, 21-15 സ്‌കോറിനായിരുന്നു സിന്ധുവിന്റെ ജയം. അതേസമയം, പുരുഷ വിഭാഗം സിംഗിള്‍സില്‍ ഇന്ത്യന്‍ താരം സമീര്‍ വര്‍മ ആദ്യ മത്സരത്തില്‍ തന്നെ പരാജയപ്പെട്ടു.
ലോക ഒന്നാം നമ്പര്‍ താരമായ കെന്റോ മെമോട്ടയോടാണ് വര്‍മ പരാജയപ്പെട്ടത്. 18-26, 6-21 എന്ന സ്‌കോറിനായിരുന്നു വര്‍മയുടെ തോല്‍വി. കളിയിലുടനീളം ആധിപത്യം പുലര്‍ത്തിയ സിന്ധുവിന്റെ ഓരോ നീക്കങ്ങളും ശ്രദ്ധയോടെയായിരുന്നു. പലപ്പോഴും യാമാഗുച്ചിക്ക് മുന്നില്‍ പരാജയപ്പെട്ട സിന്ധു ഇത്തവണ ജയിക്കണം എന്ന തീരുമാനത്തിലായിരുന്നു ഓരോ നീക്കവും നടത്തിയത്. ലോക വേദികളില്‍ മികച്ച നേട്ടം കൊയ്ത എട്ട് താരങ്ങളാണ് വേള്‍ഡ് ടൂറില്‍ മാറ്റുരയ്ക്കുന്നത്.