കോഴിക്കോട്: ഈ രാജഹംസം ഇനി സ്‌നേഹദൂതുമായി വരില്ല. സാഗരങ്ങള്‍ മറുവാക്ക് മിണ്ടുമെങ്കില്‍ അതിനേറ്റ ദുരന്തങ്ങളുടെ കഥകൂടി പറഞ്ഞുതരുമായിരുന്നു. ദേശാന്തരങ്ങള്‍ താണ്ടി കോഴിക്കോടിന്റെ ഹൃദയഭൂമിയില്‍ അതിഥിയായെത്തിയ രാജഹംസം മനുഷ്യരുടെയും തെരുവുനായ്ക്കളുടെയും ക്രൂരമായ ആക്രമണത്തെ തുടര്‍ന്ന് ജീവന്‍ വെടിഞ്ഞു.
കോഴിക്കോട് ബീച്ചില്‍ കഴിഞ്ഞ 11 ദിവസങ്ങളിലേറെയായി ഈ വിരുന്നുകാരനെത്തിയിട്ട്. പലര്‍ക്കും കൗതുകമുള്ള കാഴ്ചയായിരുന്നു അപൂര്‍വയിനം രാജഹംസം. ആതിഥ്യ മര്യാദകളോടെ അതിഥികളെ സ്വീകരിക്കുന്നവരെ അപമാനിക്കുന്ന തരത്തില്‍ ക്രൂരമായാണ് ചില സാമൂഹികവിരുദ്ധര്‍ ഈ മിണ്ടാപ്രാണിയോട് പെരുമാറിയത്. സംഘടിതമായി വേട്ടയാടി. തെരുവുപട്ടികളെ വിട്ട് ആക്രമിച്ചു. ചെറുത്തുനില്‍പ്പുകളെ അതിജീവിക്കാനാകാതെ ചിറകൊടിഞ്ഞ ഈ ദേശാടനപക്ഷിയെ കഴിഞ്ഞദിവസമാണ് പരുക്കുകളോടെ പയ്യാനക്കല്‍ ബീച്ചില്‍ കണ്ടെത്തിയത്. ചിറകൊടിഞ്ഞു. എല്ലുകള്‍ പുറത്തേക്കുന്തി. പ്രദേശവാസികള്‍ അറിയിച്ചതിനെ തുടര്‍ന്ന് വനംവകുപ്പ് അധികൃതര്‍ രാജഹംസത്തെ മൈക്കാവ് മൃഗാശുപത്രിയില്‍ എത്തിച്ച് ശസ്ത്രക്രിയയും നടത്തി. എല്ലുകള്‍ സര്‍ജറിയിലൂടെ കൂട്ടിച്ചേര്‍ത്ത് അകത്തും പുറത്തും കമ്പി തുന്നിച്ചേര്‍ക്കുകയായിരുന്നു. വെറ്ററിനറി സര്‍ജന്‍ ഡോ. സി.ജെ നിതിന്‍, ഡോ. റിജു മുഹമ്മദ് എന്നിവരുടെ നേതൃത്വത്തിലാണു ശസ്ത്രക്രിയ നടത്തിയത്. എന്നാല്‍ അതുകൊണ്ടൊന്നും രാജഹംസത്തെ രക്ഷിക്കാനായില്ല.