കോവളം: വിഴിഞ്ഞത്ത് നിന്നും അനധികൃതമായി കരിഞ്ചന്തയിലേക്ക് കടത്തുകയായിരുന്ന 2400 ലിറ്റര്‍ മണ്ണെണ്ണ വാഹനപരിശോധനയ്ക്കിടെ തിരുവല്ലം പൊലിസ് പിടികൂടി.
ലോറിയിലുണ്ടായിരുന്ന എറണാകുളം വൈപ്പിന്‍ ,സ്വാദേശികളായ ബൈജു (48), അമല്‍രാജ് (29) എന്നിവരെ തിരുവല്ലം എസ്.ഐ. ശിവകുമാറും സംഘവും പിടികൂടി.
കഴിഞ്ഞ ദിവസം രാത്രിയില്‍ തിരുവല്ലം ജങ്ഷനില്‍ വച്ചാണ് മണ്ണെണ്ണയുമായി എത്തിയ സംഘം പിടിയിലായത്. മത്സ്യത്തൊഴിലാളികള്‍ക്ക് അനുവദിച്ച 220 ലിറ്ററിന്റെ 11 ബാരല്‍ മണ്ണെണ്ണയാണ് രേഖകളില്ലാതെ കടത്തുവാന്‍ ശ്രമിച്ചതെന്ന് പൊലിസ് പറഞ്ഞു. അറസ്റ്റിലായവരെ കോടതിയില്‍ ഹാജരാക്കിയതായും പിടിച്ചെടുത്ത മണ്ണെണ്ണ സിവില്‍ സപ്‌ളൈസ് വകുപ്പ് ഉദ്വോഗസ്ഥര്‍ക്ക് കൈമാറുമെന്നും തിരുവല്ലം പൊലിസ് പറഞ്ഞു.