മംഗളൂരു: കഴിഞ്ഞ ദിവസം മംഗളൂരുവില്‍ പൊലിസ് വെടിവെപ്പില്‍ മരിച്ച നൗഷീല്‍ പ്രതിഷേധ സമരത്തചില്‍ പങ്കെടുത്തിരുന്നില്ലെന്ന് ബന്ധുക്കള്‍. ജോലി കഴിഞ്ഞു വരുന്നതിനിടെയാണ് നൗഷീലിന് നേരെ പൊലിസ വെടിയുതിര്‍ത്തതെന്ന് സഹോദരനും സുഹൃത്തുക്കളും മാധ്യമപ്രവര്‍ത്തകരോട് പറഞ്ഞു. തങ്ങള്‍ക്ക് നീതി ലഭിക്കണമെന്ന് അവര്‍ ആവശ്യപ്പെട്ടു. സിറ്റി പൊലിസ് കമ്മീഷണര്‍ക്കെതിരെ നടപടിയുണ്ടാവണമെന്നും അവര്‍ ആവശ്യപ്പെട്ടു. ജുഡീഷ്യല്‍ അന്വേഷണവും ബന്ധുക്കള്‍ ആവശ്യപ്പെടുന്നുണ്ട്.

മംഗളൂരുവില്‍ കൊല്ലപ്പെട്ടവരുടെ മൃതദേഹങ്ങള്‍ സൂക്ഷിച്ച മോര്‍ച്ചറിക്ക് സമീപം കനത്ത പൊലിസ് സുരക്ഷ ഏര്‍പെടുത്തിയിട്ടുണ്ട്. കമ്മീഷണറുള്‍പെടെ ഉയര്‍ന്ന പൊലിസ് ഉദ്യോഗസ്ഥര്‍ സ്ഥലത്തെത്തിയിട്ടുണ്ട്. നൗഷീലിന്റെ ബന്ധുക്കളെ പോലും മോര്‍ച്ചറിക്ക് സമീപം നില്‍ക്കാന്‍ പൊലിസ് അനുവദിക്കുന്നില്ല. മാധ്യമപ്രവര്‍ത്തകരേയും അടുപ്പിക്കുന്നില്ല.

 പൊലിസ് വെടിവയ്പ്പില്‍ യു.പിയിലെ ലഖ്‌നോവില്‍ ഒരാളും കര്‍ണാടകയിലെ മംഗളൂരുവില്‍ രണ്ടുപേരും കൊല്ലപ്പെട്ടിരുന്നു.

കണ്‍ടുക സ്വദേശി ജലീല്‍ കുദ്രോളി (49), നൗഷീന്‍ ബെന്‍ഗ്രെ (23) എന്നിവരാണ് മഗളൂരുവില്‍ കൊല്ലപ്പെട്ടത്.