തിരുവനന്തപുരം: തലസ്ഥാനത്തെ എടിഎം സെന്ററുകളില്‍ ഇലക്ട്രോണിക് ചിപ്പുവച്ച് വന്‍ കവര്‍ച്ച നടത്തിയത് റുമേനിയക്കാര്‍.  ക്രിസ്റ്റിന്‍ വിക്ടര്‍, ഇലി, ഫ്‌ളോറിക് എന്നീ റുമേനിയന്‍ സ്വദേശികളാണ് തട്ടിപ്പിനു പിന്നിലെന്ന് പൊലിസ് കണ്ടെത്തി.


തട്ടിപ്പു നടത്തിയ പ്രതികള്‍ ഉപയോഗിച്ച രണ്ടു ബൈക്കുകള്‍ കസ്റ്റഡിയിലെടുത്തിട്ടുണ്ട്. കോവളത്തുനിന്നാണ് ബൈക്കുകള്‍ കണ്ടെത്തിയത്.

ഇവരുടെ പാസ്‌പോര്‍ട്ട് വിവരങ്ങളും തലസ്ഥാനത്ത് താമസിച്ച ഹോട്ടല്‍ മുറികളും പൊലിസ് കണ്ടെത്തിയിട്ടുണ്ട്്. കഴിഞ്ഞ രണ്ടു മാസങ്ങളില്‍ ഇവര്‍ തലസ്ഥാനത്തുണ്ടായിരുന്നുവെന്നാണ് പൊലിസ് പറയുന്നത്.

തിരുവനന്തപുരത്ത് ഇവര്‍ താമസിച്ച് ഹോട്ടലില്‍ നിന്നുള്ള സിസിടിവി ദൃശ്യങ്ങളും പൊലിസിന് ലഭിച്ചിട്ടുണ്ട്.


ടൂറിസ്റ്റ് വീസയിലാണ് ഇവര്‍ ഇന്ത്യയിലെത്തിയത്. ഇവര്‍ താമസിച്ചത് ആഡംബര ഹോട്ടലുകളിലാണെന്നും വ്യക്തമായിട്ടുണ്ട്.
 
കേസ് അന്വേഷണത്തിന് ഇന്റര്‍പോളിന്റെ സഹായം തേടിയെന്ന് എജി മനോജ് എബ്രഹാം അറിയിച്ചു.

കവര്‍ച്ചയെ തുടര്‍ന്ന് പണം നഷ്ടമായവര്‍ക്ക് തിരികെ നല്‍കുമെന്ന് എസ്ബിടി അറിയിച്ചു. പണം നഷ്ടമായവരുടെ അക്കൗണ്ടുകള്‍ തത്കാലത്തേക്ക് ബ്ലോക്ക് ചെയ്തിട്ടുണ്ട്. പകരം പുതിയ എടിഎം കാര്‍ഡ് നല്‍കും.


തിരുവനന്തപുരം നഗരത്തില്‍ ആല്‍ത്തറ ജംഗ്ഷന്‍, കവടിയാര്‍, വട്ടിയൂര്‍ക്കാവ് എന്നിവിടങ്ങളിലെ എസ.്ബി.ഐ, എസ്.ബി.ടി എടിഎമ്മുകളില്‍ നിന്നാണു പണം നഷ്ടപ്പെട്ടിട്ടുള്ളത്.