കണ്ണൂര്‍: തെയ്യം കലാകാരന്‍ കണ്ണൂര്‍ അതിയടം പൊടിക്കളംപറമ്പില്‍ കണ്ണപ്പെരുവണ്ണാന്റെ നിര്യാണത്തില്‍ മുഖ്യമന്ത്രി പിണറായി വിജയന്‍ അനുശോചിച്ചു. തെയ്യം കലയുടെ കുലപതിയായി അറിയപ്പെട്ട അദ്ദേഹം ഏഴു പതിറ്റാണ്ടിലേറെ രംഗത്ത് സജീവമായിരുന്നു. ഇടതുപക്ഷ സഹയാത്രികനായിരുന്ന അദ്ദേഹം തെയ്യം, ഗന്ധര്‍വന്‍പാട്ട്, കുറുന്തിനിപ്പാട്ട് തുടങ്ങിയ അനുഷ്ഠാനകലകള്‍ വിദേശത്തുള്‍പ്പെടെ അവതരിപ്പിച്ച് ജനകീയമാക്കുന്നതില്‍ മുഖ്യപങ്ക് വഹിച്ച വ്യക്തിയായിരുന്നു. കണ്ണപ്പെരുവണ്ണാന്റെ നിര്യാണത്തില്‍ കുടുംബത്തോടൊപ്പം ദുഃഖം പങ്കുവയ്ക്കുന്നതായി മുഖ്യമന്ത്രി പറഞ്ഞു.