കോഴിക്കോട്: 'ഒരുമയോടെ വസിക്കാം സൗഹൃദം കാക്കാം' എന്ന സന്ദേശവുമായി എസ്.കെ.എസ്.എസ്.എഫ് സംഘടിപ്പിക്കുന്ന ദേശീയോദ്ഗ്രഥന പ്രചാരണത്തിന്റെ ഭാഗമായി പ്രഭാഷകര്‍ക്കും എഴുത്തുകാര്‍ക്കും സംഘടനാ ഭാരവാഹികള്‍ക്കുമായുള്ള ശില്‍പശാല ഇന്ന് തൃശൂരിലും നാളെ കോഴിക്കോട്ടും നടക്കും.
തെരഞ്ഞെടുക്കപ്പെട്ട പ്രതിനിധികള്‍ക്കു പുറമെ ജില്ലാ ഭാരവാഹികളും മേഖലാ പ്രസിഡന്റ്, ജനറല്‍ സെക്രട്ടറിമാരും പങ്കെടുക്കും. ലീഡേഴ്‌സ് കാരവന്റെ ഭാഗമായുള്ള മേഖലാ അദാലത്ത് പരിപാടിയുടെ ഭാഗമായി നടക്കും.
ഇന്ന് ഉച്ചക്ക് രണ്ട് മണിക്ക് തൃശൂര്‍ എം.ഐ.സി ഓഡിറ്റോറിയത്തില്‍ നടക്കുന്ന പരിപാടിയില്‍ ഓണംമ്പിള്ളി മുഹമ്മദ് ഫൈസി, സത്താര്‍ പന്തലൂര്‍ എന്നിവര്‍ പങ്കെടുക്കും. തിരുവനന്തപുരം മുതല്‍ പാലക്കാട് വരെയുള്ള ജില്ലകളിലെ പ്രതിനിധികളാണ് തൃശൂരിലെ ശില്‍പശാലയില്‍ പങ്കെടുക്കുക.
മറ്റു ജില്ലകളിലെ പ്രതിനിധികള്‍ക്ക് നാളെ രാവിലെ 11 മണിക്ക് കോഴിക്കോട് സുപ്രഭാതം ഓഡിറ്റോറിയത്തില്‍ പരിപാടി നടക്കും. ഉച്ചക്ക് രണ്ടിന് ആരംഭിക്കുന്ന ശില്‍പശാലയില്‍ സത്താര്‍ പന്തലൂര്‍, ഡോ. സുബൈര്‍ ഹുദവി, കെ.എന്‍.എസ് മൗലവി എന്നിവര്‍ സംബന്ധിക്കും.
ദേശീയോദ്ഗ്രഥന പ്രചാരണത്തിന്റെ ജില്ലാതല ഉദ്ഘാടന പരിപാടികള്‍ ഓഗസ്റ്റ് പത്തിനകം പൂര്‍ത്തിയാകും. ഓഗസ്റ്റ് 15 ന് വൈകിട്ട് നാലിന് സംസ്ഥാനത്തെ 170 കേന്ദ്രങ്ങളില്‍ ഫ്രീഡം സ്‌ക്വയര്‍ നടക്കും.