വളാഞ്ചേരി: വൈജ്ഞാനിക വിപ്ലവത്തിന്റെ മുപ്പതാണ്ട് എന്ന ശീര്‍ഷകത്തില്‍ മൂന്നു ദിവസം നീണ്ടു നില്‍ക്കുന്ന വളാഞ്ചേരി മര്‍കസ് 30-ാം വാര്‍ഷിക സനദ്ദാന മെഗാ സമ്മേളനത്തിന് തുടക്കമായി. രാവിലെ പാണക്കാട് സാദാത്തീങ്ങളുടേയും മര്‍കസ് സ്ഥാപകന്‍ കെ.കെ അബൂബക്കര്‍ ഹസ്രത് താനൂര്‍, സ്ഥാപിത സെക്രട്ടറി കെ.ടി കുഞ്ഞുട്ടി ഹാജി എന്നിവരുടെയും മഖ്ബറ സിയാറത്തോടെയാണ് സമ്മേളന പരിപാടികള്‍ ആരംഭിച്ചത്. പാണക്കാട് സയ്യിദ് ഹൈദരലി ശിഹാബ് തങ്ങള്‍, സമസ്ത കേന്ദ്ര മുശാവറ അംഗം മരക്കാര്‍ ഫൈസി നിറമരുതൂര്‍ എന്നിവര്‍ പ്രാര്‍ഥന നിര്‍വഹിച്ചു.
വൈകിട്ട് പാണക്കാട് സയ്യിദ് അബ്ബാസലി ശിഹാബ് തങ്ങള്‍ പതാകയുയര്‍ത്തി. തുടര്‍ന്ന് നടന്ന ഉദ്ഘാടന സമ്മേളനം പാണക്കാട് സയ്യിദ് ബശീറലി ശിഹാബ് തങ്ങള്‍ ഉദ്ഘാടനം ചെയ്തു. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍ അധ്യക്ഷനായി. അഹ്മദ് കബീര്‍ ബാഖവി കാഞ്ഞാര്‍ മുഖ്യ പ്രഭാഷണം നിര്‍വഹിച്ചു. ഡോ. ബഹാഉദ്ദീന്‍ മുഹമ്മദ് നദ്‌വി, സി. മമ്മൂട്ടി എം.എല്‍.എ സംബന്ധിച്ചു. ചെമ്പുലങ്ങാട് മുഹമ്മദ് കുട്ടി മുസ്‌ലിയാര്‍ പ്രാര്‍ഥന നടത്തി.
രാവിലെ നടന്ന സിയാറത്തിന് പ്രൊഫ. കുഞ്ഞാമു ഫൈസി താനൂര്‍, പ്രൊഫ. മുഹമ്മദ് കുട്ടി ഫൈസി, പ്രൊഫ. എം.കെ അബ്ദുല്ല ഫൈസി കൊടശ്ശേരി നേതൃത്വം നല്‍കി. മജ്‌ലിസുന്നൂര്‍ സംഗമത്തിന് കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കി.
ഹസന്‍ സഖാഫി പൂക്കോട്ടൂര്‍ ഉദ്‌ബോധന ഭാഷണം നടത്തി. പ്രൊഫ. ഹംസക്കുട്ടി ബാഖവി ആദൃശ്ശേരി, കെ.കെ.എസ് തങ്ങള്‍ വെട്ടിച്ചിറ, കെ.വി ഹംസ മൗലവി സംസാരിച്ചു.
സമ്മേളനത്തിന്റെ രണ്ടാം ദിനമായ ഇന്ന് 'അല്‍ ഗൈസ്' ഇസ്‌ലാമിക് ആന്‍ഡ് ആര്‍ട്‌സ് കോളജില്‍നിന്ന് പഠനം പൂര്‍ത്തിയാക്കിയ 120ല്‍ പരം വഫിയ്യ പണ്ഡിതകള്‍ക്കുള്ള സനദ്ദാന സംഗമം നടക്കും.
വൈകിട്ട് വിദ്യാതീരം സെഷന്‍ കോഴിക്കോട് വലിയ ഖാസി പാണക്കാട് നാസിര്‍ അബ്ദുല്‍ ഹയ്യ് ശിഹാബ് തങ്ങള്‍ ഉദ്ഘാടനം ചെയ്യും. ശിയാസലി വാഫി മുഖ്യഭാഷണം നിര്‍വഹിക്കും. ചെറുവാളൂര്‍ ഹൈദ്രോസ് മുസ്‌ലിയാര്‍ പ്രാര്‍ഥനക്ക് നേതൃത്വം നല്‍കും.