ലക്‌നോ: പൗരത്വനിയമ ഭേദഗതിയ്‌ക്കെതിരായ പ്രതിഷേധം രാജ്യത്തിന്റെ വിവിധ ഭാഗങ്ങളില്‍ ഇന്നും ശക്തം. ഉത്തര്‍പ്രദേശില്‍ പൊലിസ് നടപടിയ്ക്കിടെ മരിച്ചവരില്‍ എട്ടു വയസുകാരനും. പൊലിസ് നടപടിയ്ക്കിടെയുണ്ടായ തിക്കിലും തിരക്കിലും പെട്ടാണ് വാരണാസിയില്‍ കുട്ടി മരിച്ചത്.

മീററ്റില്‍ നാല് പേര്‍ കൊല്ലപ്പെട്ടു. മറ്റിടങ്ങളില്‍ ആറ് പേര്‍ മരണപ്പെട്ടുവെന്നും പൊലിസ്. ആകെ മരണം 12 ആയിട്ടുണ്ട്.

21 സ്ഥലങ്ങളില്‍ ഇന്റര്‍നെറ്റ് റദ്ദാക്കിയിട്ടുണ്ട്. പല സ്ഥലങ്ങളിലും റെഡ് അലേര്‍ട്ട് പ്രഖ്യാപിച്ചിട്ടുണ്ട്.

സംസ്ഥാനത്തെ പല നഗരങ്ങളിലും ഇന്റര്‍നെറ്റ് നിയന്ത്രണം തുടരുന്നുണ്ട്. ഫിറോസാബാദില്‍ വ്യാപക അക്രമമുണ്ടായി. ബസുകള്‍ ഉള്‍പ്പടെ വാഹനങ്ങള്‍ കത്തിച്ചു. ഹാപൂരിലും പ്രതിഷേധം അക്രമാസക്തമായി.

ഡല്‍ഹിക്കടുത്ത് ഗാസിയാബാദിലും ഇന്ന് രാവിലെ പത്തുമണിവരെ മൊബൈല്‍ ഇനറര്‍നെറ്റ് നിയന്ത്രിച്ചിട്ടുണ്ട്. ലക്‌നൗവിലും മീററ്റിലും ബിജ്‌നോറിലും കൂടുതല്‍ സുരക്ഷാ ഉദ്യോഗസ്ഥരെ നിയോഗിച്ചു. സര്‍വകലാശാലകള്‍ അടക്കം എല്ലാ വിദ്യാഭ്യാസ സ്ഥാപനങ്ങള്‍ക്കും ഇന്ന് അവധിയാണ്.

വിവിധ നഗരങ്ങളിലുണ്ടായ പ്രതിഷേധം പല നഗരങ്ങളിലും അക്രമാസക്തമായിരുന്നു. നിരവധി പേരെ പൊലിസ് കസ്റ്റഡിയിലെടുത്തിട്ടുണ്ട്. ബുലന്ത് ഷഹറില്‍ പൊലിസിന് നേരെ പ്രതിഷേധക്കാര്‍ കല്ലെറിഞ്ഞു. പൊലിസ് ലാത്തിച്ചാര്‍ജ്ജ് നടത്തി. ബഹൈച്ചിലും പൊലിസ് പ്രതിഷേധക്കാരെ വിരട്ടി ഓടിച്ചു.

മധ്യപ്രദേശിലും നിരോധനാജ്ഞ പ്രഖ്യാപിച്ചിട്ടുണ്ട്. സംസ്ഥാനത്തെ 50 ജില്ലകളിലാണ് നിരോധനാജ്ഞ പ്രഖ്യാപിച്ചത്.